ტრაგედია კვიპროსში: პოლიციელმა უცხოელის გადარჩენა სცადა და ორივე დაიღუპა

კვიპროსში, ლარნაკას მახლობლად, სოფელ ვოროკლინში წუხელ ორი ადამიანი დაიღუპა.

გარდაცვლილები არიან 51 წლის პოლიციელი პეტროს ელეფთერიუ, რომელიც ვოროკლინის პოლიციის განყოფილებაში მსახურობდა და უცხოელი, რომლის შესახებაც  დეტალები ჯერჯერობით უცნობია.

ორივე მათგანი გზაზე გამვლელმა მანქანამ გაიტანა იმ მომენტში, როცა პოლიციელი ცდილობდა უცხოელის დაცვას და გზიდან გადაყვანას.

ავარიამდე ვოროკლინის პოლიციის განყოფილებაში შევიდა ინფორმაცია, რომ მამაკაცი გზატკეცილზე დადიოდა და გამვლელი მანქანებისგან შეჯახების საფრთხეს ქმნიდა.

პოლიციელი პეტროს ელეფთერიუ საპატრულო მანქანით მივიდა იმ ადგილზე, სადაც უცნობი მამაკაცი შენიშნეს და მისი გაყვანა სცადა. მან საპატრულო მანქანა უსაფრთხოების ზოლში გააჩერა.

45 წლის მძღოლმა გზაზე ორი ადამიანი ვერ შეამჩნია და მათ გადაუარა, რის შედეგადაც ისინი სასიკვდილოდ დაშავდნენ. ლარნაკის საავადმყოფოში, სადაც ისინი გადაიყვანეს, მათი გარდაცვალება დადასტურდა.

გარდაცვლილი პოლიციელი ორი მცირეწლოვანი შვილის მამა იყო.