ქალთა დღესთან დაკავშირებული მშვიდობიანი აქცია სინდაგმაზე 

ქალთა დღესთან დაკავშირებული მშვიდობიანი აქცია სინდაგმაზე 

ქალთა საერთაშორისო დღესთან დაკავშირებით ათენის ცენტრში დღესაც გაიმართა მშვიდობიანი მსვლელობა, რომლის მთავარ მოთხოვნად ისევ ქალთა მიმართ დისკრიმინაციის აღმოფხვრა რჩება. 

სხვადასხვა პოლიტიკური იდეოლოგიის, ეროვნებისა თუ ასაკის  ადამიანებმა ფერადი აფიშებით, ამ დღისთვის დამახასიათებელი სლოგანებითა და მუსიკალური ნომრებით კლავთმონოსის მოედნიდან დაიწყეს მსვლელობა.
გულის ამაჩუყებელი იყო ახალგაზრდების მიერ შესრულებული სიმღერა, რომელიც ტემბში დაღუპულ მგზავრებს ეძღვნებოდათ, ამაღელვებელი იყო სლოგანები, რომლებიც კიდევ ერთხელ გვახსენებენ თუ როგორი ძლიერი და უშიშარი შეიძლება იყოს ქალი და რომ მის შესაძლებლობებს საზღვარი არ აქვს, შესაბამისად არ უნდა იზღუდებოდეს ქალის წარმატება არც იმ “გამჭვირვალე ჭერით”, რომელი პრაქტიკაც ასე საერთაშორისო დონეზეა გავრცელებული.

რაც არ უნდა ჩაგვინერგოთ შიში, ფრთებს მაინც ვერ დაგვაჭრით!

აქცია მშვიდობიანად მიმდინარეობდა მანამ, სანამ ახალი პარლამენტის შენობიდან სიგრუს გამზირის მიმდებარე ტერიტორიაზე საბერძნეთის სპეც.დანიშნულების რაზმის წარმომადგენლები არ შეუერთდნენ აქციას, რომლებიც დღის ბოლოს აქციის დაშლასაც შეეცადნენ. 

ადგილობრივი პრესის მიერ გავრცელებული ინფორმაციის თანახმად აქციის მონაწილეებმა კოლოკოტრონის ძეგლს საღებავები შეასხეს და სწორედ ეს გახდა აქციის დარბევის მიზეზი, თუმცა qartvelebi.gr-ის აქციაზე ყოფნის განმავლობაში მსგავსი ფაქტი და აქციის მონაწილეების მხრიდან გადაცდომა არ დაფიქსირებულა.