შესაძლოა თუ არა ფილმი გახდეს კუნძულებისა და ღირსშესანიშნავი ადგილების ტურისტებით გადატვირთვის მიზეზი
შესაძლოა თუ არა ფილმი გახდეს კუნძულებისა და ღირსშესანიშნავი ადგილების ტურისტებით გადატვირთვის მიზეზი
ბრიტანული გამოცემა The Guardian წერს, რომ კრისტოფერ ნოლანის ფილმი „ოდისეა“ მესინიას საერთაშორისო ყურადღების ცენტრში მოაქცევს, თუმცა ადგილობრივები და გარემოსდაცვითი ექსპერტები შიშობენ, რომ ფილმის წარმატებას ტურისტების მკვეთრი ზრდა მოჰყვება, რაც რეგიონზე დამატებით ზეწოლას მოახდენს.
გამოცემის მიხედვით, მესინია უკვე განიცდის წყლის დეფიციტის, კლიმატის ცვლილებისა და სწრაფი ტურისტული განვითარების გავლენას. ბოლო 30 წლის განმავლობაში რეგიონში საშუალო ტემპერატურა 1,5°C-ით გაიზარდა, რაც მიწისქვეშა წყლების მარაგის შემცირებას იწვევს.
The Guardian ყურადღებას ამახვილებს ასევე იალოვას ლაგუნაზე, რომელიც Natura 2000-ის დაცულ ტერიტორიას წარმოადგენს. ექსპერტების შეფასებით, წყლის რესურსებზე მზარდი დატვირთვა და ტურისტული ინფრასტრუქტურის გაფართოება ამ უნიკალური ეკოსისტემისთვის სერიოზულ საფრთხეს ქმნის.
მიუხედავად იმისა, რომ ტურიზმის განვითარებამ ადგილობრივ ეკონომიკას მნიშვნელოვანი სარგებელი მოუტანა, ადგილობრივები მიიჩნევენ, რომ რეგიონს სჭირდება მდგრადი ტურიზმის მოდელი, რომელიც ბუნებრივი რესურსებისა და ადგილობრივი კულტურის დაცვას უზრუნველყოფს.
The Guardian-ის სტატიის მიხედვით მესინია დღეს მნიშვნელოვანი არჩევანის წინაშე დგას, გააგრძელოს მასობრივი ტურიზმის განვითარება თუ უპირატესობა მიანიჭოს ისეთ მოდელს, რომელიც ეკონომიკურ ზრდას გარემოსა და ადგილობრივი საზოგადოების ინტერესებთან დააბალანსებს.
