ხანძრის 1000-ზე მეტი აქტიური კერა კანადაში-მიმდინარეობს ტერიტორიების ევაკუაცია
კანადის დასავლეთ პროვინცია ბრიტანეთის კოლუმბიამ პარასკევს საგანგებო მდგომარეობა გამოაცხადა, რადგან მეხანძრეები ებრძვიან ტყის ხანძარს, რომელიც მძვინვარებს ქალაქ დასავლეთ კელოუნას ზემოთ მთებში, რის გამოც ათასობით ადამიანი იძულებული გახდა დაეტოვებინა საკუთარი სახლები.
ცეცხლმა და კვამლმა დასავლეთ კელოუნადან დაფარა ცა საკმაოდ დიდ ფართობზე. მანამდე ამ ტერიტორიაზე საჰაერო სივრცე დაიკეტა წყლის დასხმით ხანძრების ჩაქრობის მცდელობის გამო.
„ჩვენ ისტორიაში ყველაზე უარესი ხანძრის წინაშე ვდგავართ“, – განუცხადა ბრიტანეთის კოლუმბიის პრემიერმა დევიდ ებიმ ჟურნალისტებს საგანგებო მდგომარეობის გამოცხადების შემდეგ. „ამ უპრეცედენტო ვითარებამ ამაღამ პიკს მიაღწია. ბოლო 24 საათის განმავლობაში მდგომარეობა გამწვავდა და სწრაფად გაუარესდა“.
დაახლოებით 4,500 ადამიანს მიუწოდეს სახლების დატოვება ბოლო 24 საათის განმავლობაში. კიდევ 20,000-ს ეცნობა, რომ მზად იყვნენ ევაკუაციისთვის.
ცეცხლი, რომელიც ემუქრება იელოუნაიფს, ჩრდილოეთ ტერიტორიების დედაქალაქს, შორს არ წასულა, განაცხადა ადგილობრივმა სახანძრო სამსახურმა, თუმცა ძლიერი ქარი კვლავ უბიძგებს ცეცხლს ქალაქისკენ და შესაძლოა მის გარეუბნამდე მიაღწიოს უახლოეს საათებში.
ხანძარი ქალაქიდან ჩრდილო-დასავლეთით 15 კილომეტრშია. ქალაქგარეთ გამავალ ერთადერთ გზატკეცილზე, რომელიც ღია რჩება, ხანძარი მძვინვარებს.
არსებობს რეალური საფრთხე, რომ ავტომაგისტრალები და აეროპორტი დაზარალდეს ამ ხანძრის შედეგად.
ექსპერტები ამბობენ, რომ კლიმატის ცვლილებამ ხანძრის პრობლემა გაამწვავა. ოფიციალური პირების თქმით, გვალვამ და მაღალმა ტემპერატურამ წვლილი შეიტანა ხანძრების რაოდენობასა და ინტენსივობაში, რადგან კანადის დიდ ნაწილში პირობები არასეზონურად მშრალი იყო.
