კრიტზე არქეოლოგიური ნივთებით უკანონოდ მოვაჭრეთა დანაშაულებრივი ქსელი გამოვლინდა

კრიტზე, მალევიზის მუნიციპალიტეტის ტერიტორიაზე,  პოლიციის მიერ ჩატარებული ფართომასშტაბიანი ოპერაციის შედეგად  არქეოლოგიური სიძველეებით უკანონოდ მოვაჭრეთა დანაშაულებრივი ქსელი გამოვლინდა.

პრესაში გავრცელებული ინფორმაციით ამ დროისათვის დაკავებულია ექვსი ადამიანი, ხოლო ჩხრეკისას ამოღებულია ძველი არქეოლოგიური ნივთები, მათ შორის უძველესი ლარნაკები, რომელთა ღირებულებაც, წინასწარი შეფასებით  500 000 ევროს აღემატება.

დაკავებულებს შორის არიან ამჟამად პენსიონერი, ყოფილი არქეოლოგი და ბიზნესმენი.

დანაშაულებრივი ქსელი  მალევიზის მუნიციპალიტეტის სოფელ კრუსონასში იყო ლოკალიზებული, სადაც ასევე ინახებოდა უკანონოდ მოპოვებული ათობით უძველესი ნივთი.

პოლიციის ინფორმაციით, ეს ბოლო წლების განმავლობაში სიძველეების ძარცვის ერთ- ერთი  ყველაზე დიდი შემთხვევაა, ხოლო მოგება, რომელსაც მძარცველები მოპარული ნივთების გაყიდვის შედეგად  ელოდნენ, მილიონ ევროს უახლოვდება.

ოპერაცია ორგანიზებული დანაშაულის წინააღმდეგ ბრძოლის ჯგუფის მიერ იყო  დაგეგმილი.

გავრცელებული ინფორმაციით საქმეზე გამოძიება სულ მცირე 4 თვე მიმდინარეობდა  და გუშინ,  ტერიტორიის აღმოჩენამ, სადაც სიძველეები ინახებოდა, ოპერაციის დაწყებას  მწვანე შუქი აუნთო.

როგორც ირკვევა სიძველეებით მოვაჭრეები უკვე დაუკავშირდნენ  უცხოელ  დაინტერესებულ პირს, რომელსაც აღმოჩენების ნაწილის ყიდვა სურდა.

ჯერჯერობით მხოლოდ ათობით ობიექტია გამოვლენილი, ნაპოვნია 7 ურნა, უძველესი ვაზა და სარკოფაგი რომელთა ღირებულებაც ძალიან მაღალია.

აღმოჩენილ ნივთებს უახლოეს დღეებში არქეოლოგიური ექსპერტიზა ჩაუტარდება, ხოლო დაკავებულებს სავარაუდოდ პროკურატურას წარუდგენენ.