თესალონიკი: ახალგაზრდებმა ავტობუსის მძღოლი სცემეს

საბერძნეთში ახალგაზრდების მხრიდან გამოვლენილი აგრესიული ქმედებისა და ძალადობის ფაქტების რაოდენობა დღითიდღე იმატებს.

უახლესი ინციდენტი გასულ შაბათს, თესალონიკში მოხდა, როდესაც ახალგაზრდებმა ავტობუსის მძღოლი სცემეს მათ მიმართ გაკეთებული შენიშვნის გამო, რადგან საჯარო ტრანსპორტში ძალიან ხმაურობდნენ.

შემთხვევა გვიან ღამით, აღმოსავლეთ თესალონიკში, მიხანიონას რაიონში, 72 ნომერ ავტობუსში მოხდა. კერძოდ, ავტობუსში მყოფი დაახლოებით 20 მოზარდის მიერ გამოწვეული ხმაურით შეწუხებულმა სხვა მგზავრებმა მძღოლს მიმართეს, რომელმაც უბრალო შენიშვნის მიცემით სცადა ახალგაზრდების დაშოშმინება. ისინი თავის მხრივ დაელოდნენ, როდის განთავისუფლდებოდა ავტობუსი დანარჩენი მგზავრებისგან და ტერმინალამდე რამდენიმე გაჩერებით ადრე თავს დაესხნენ მძღოლს.

მათ სახესა და მუცლის არეში დარტყმებით სერიოზული დაზიანება მიაყენეს 50 წლის მამაკაცს, რომელსაც თავის დასაცავად ადგილიდან ადგომის საშუალებაც არ ჰქონდა. იმის გამო, რომ ავტობუსი დასახლებული ადგილიდან საკმაო დაშორებით იმყოფებოდა, შემთხვევას თვითმხილველები არ ჰყავს. მძღოლმა, როგორც კი თავდამსხმელები ავტობუსიდან ჩავიდნენ მაშინვე პოლიციას შეატყობინა და შემთხვევის ადგილზე სასწრაფო დახმარება გამოიძახა.

ამ დრომდე დამნაშავეთა იდენტიფიკაცია ვერ მოხერხდა, თუმცა მათ წინააღმდეგ სარჩელი უკვე აღძრულია.