პატიმრობაში დატოვეს 53 წლის კაცი, რომელმაც საკუთარი ძმისთვის თვალების გამოთხრა სცადა
პატიმრობაში დატოვეს 53 წლის კაცი, რომელმაც საკუთარი ძმისთვის თვალების გამოთხრა სცადა
საბერძნეთის ქალაქ ვოლოსის სამწევრიანმა სისხლის სამართლის სასამართლომ ძალაში დატოვა 4-წლით თავისუფლების აღკვეთის განაჩენი პირობითი მსჯავრის გარეშე 53 წლის კაცისთვის, რომელმაც 2025 წლის ზაფხულში საკუთარ ძმას დაესხა თავს და მისთვის თვალების ამოთხრა სცადა. მსჯავრდებული ამჟამად ლარისის ციხეში იხდის სასჯელს.
შეგახსნებთ, რომ 2025 წლის 19 ივლისს 53 წლის კაცი მშობლების სახლში მივიდა, სადაც მისი დედა და ძმა ცხოვრობენ. ის სახლში ძალის გამოყენებით შევიდა, კარი წიხლით შეანგრია და პირდაპირ სამზარეულოსკენ გაემართა, სადაც მისი ძმა იმყოფებოდა.
დაზარალებულის განცხადებით, თავდამსხმელმა ჯერ ნეკნების არეში მუშტი დაარტყა, შემდეგ კი თითებით თვალების ამოთხრა სცადა. სწორედ ასე აღწერა ინციდენტი ბრალდებულის ძმამ ვოლოსის ერთპიროვნულ სასამართლოში, სადაც საქმე დაჩქარებული პროცედურით განიხილეს.
სასამართლოზე გაირკვა, რომ ბრალდებული უკვე 30 წელია შიზოფრენიით არის დაავადებული. იმავე წლის თებერვალში იგი გათავისუფლდა ციხიდან, სადაც ხუთი თვე ჰქონდა გატარებული. მის მიმართ მოქმედებდა შემაკავებელი ზომებიც, რადგან ეს არ იყო პირველი შემთხვევა ოჯახის წევრების მიმართ ძალადობრივი ხასიათის გამოვლენის.
პირველი ინსტანციის სასამართლო პროცესზე ბრალდებული მხოლოდ საცვლებითა და ღილებგახსნილი პერანგით გამოცხადდა. ის ფეხშიშველი იყო და მთელი პროცესის განმავლობაში დაძაბულობას ქმნიდა. პოლიციელებს ხელბორკილების მოხსნას სთხოვდა და სიტყვიერ შეურაცხყოფას აყენებდა საკუთარ ძმას, როდესაც ეს უკანასკნელი ჩვენებას აძლევდა.
სასამართლომ ბრალდებული დამნაშავედ სცნო ოჯახში ძალადობის ფარგლებში სხეულის მსუბუქი დაზიანების მიყენებისთვის და მუქარისთვის. მოსამართლეებმა მას 4 წლით თავისუფლების აღკვეთა შეუფარდეს პირობითი მსჯავრის გარეშე, რაც მისი მაღალი საშიშროებით ახსნეს, და სასჯელის სრულად მოხდის განკარგულებაც გასცეს.
სააპელაციო განხილვის შემდეგ, ვოლოსის სამწევრიანმა სისხლის სამართლის სასამართლომ იგივე გადაწყვეტილება მიიღო და სასჯელი უცვლელი დატოვა.
