ელენიკოს პარკი – ათენის ახალი მწვანე სივრცე

ელენიკოს პარკი – ათენის ახალი მწვანე სივრცე

ათენში, ყოფილი ელინიკოს აეროპორტის ტერიტორიაზე, The Ellinikon Park ერთ-ერთ ყველაზე დიდ ურბანულ პარკად გარდაიქმნება ევროპაში. მისი ტერიტორიის 70%-ზე მეტი გამწვანებული იქნება, დაირგვება 30 000-ზე მეტი ხე და დაახლოებით 3 მილიონი ბუჩქი.

პარკში წარმოდგენილი იქნება 520-ზე მეტი სახეობის მცენარე და ცხოველი, რომელთა 70%-ზე მეტი ადგილობრივი ან ადგილობრივ კლიმატთან ადაპტირებული სახეობა იქნება.

პარკის დაგეგმარებაში განსაკუთრებული ყურადღება ეთმობა კლიმატის ცვლილებასა და სიცხესთან ადაპტაციას. შეიქმნება „გრილი მარშრუტები“, სადაც ტემპერატურა მიმდებარე ასფალტირებულ ტერიტორიებზე 4°C-ით დაბალი იქნება. დასასვენებელ ადგილებში ჩრდილი ტერიტორიის 60%-ზე მეტს დაფარავს, ხოლო წყლის არხები, მცირე წყლის ობიექტები და ნისლის სისტემები დამატებით გაგრილებას უზრუნველყოფს.

განსაკუთრებული ყურადღება ეთმობა წყლის დაზოგვას. ჭკვიანი სარწყავი სისტემა, რომელიც ნიადაგისა და ამინდის სენსორებს იყენებს, წყლის მოხმარებას 90%-მდე შეამცირებს. პარკს ექნება ჩამდინარე წყლების გამწმენდი სისტემა, რომელიც დღეში 7 000 კუბურ მეტრამდე გადამუშავებულ წყალს წარმოქმნის. ასევე გათვალისწინებულია 10 000 კუბური მეტრის ტევადობის წყლის რეზერვუარი.

წვიმის წყლის მართვა მთლიანად პარკის ტერიტორიაზე მოხდება, რაც დატბორვის რისკის შემცირებას შეუწყობს ხელს. მშენებლობისას ასევე გამოიყენებენ ყოფილი აეროპორტის ტერიტორიიდან მიღებულ მასალებს, რაც ნარჩენებსა და გარემოზე ზემოქმედებას შეამცირებს.

პარკის ბილიკები ბუნებრივ რელიეფს მოერგება და შეიქმნება უწყვეტი, დაჩრდილული და ადაპტირებული საფეხმავლო ქსელი. ამასთან, სპეციალური სისტემები მუდმივად გააკონტროლებს ტემპერატურას, ტენიანობას, მზის გამოსხივებასა და ნიადაგის მდგომარეობას.

The Ellinikon Park-ის კონცეფცია აერთიანებს გამწვანებას, წყლის რესურსების დაზოგვას, სიცხის შემცირებას და მდგრად ინფრასტრუქტურას, რაც მას თანამედროვე ქალაქის კლიმატთან ადაპტირებული პარკის ერთ-ერთ მნიშვნელოვან მაგალითად აქცევს.