89 წლის ბერძენი-ამერიკელის პირველი ვიზიტი მის ისტორიულ სამშობლოში-საბერძნეთში
ბოლო დღეებში სოციალურ მედიაში აქტიურად ვრცელდება 89 წლის ბერძენი-ამერიკელი მოხუცი მამაკაცის (რომლის ვინაობაც უცნობია), მის ისტორიულ სამშობლოში-საბერძნეთში პირველი ვიზიტის ამაღელვებელი კადრები, რომელიც მისმა შვილიშვილმა აღბეჭდა და გაავრცელა.
ის სავარაუდოდ მეორე თაობის ბერძენია, რომლის მშობლებიც დაიბადნენ და გაიზარდნენ საბერძნეთში, შემდეგ კი დატოვეს ქვეყანა და ემიგრაციაში წავიდნენ შეერთებულ შტატებში.
TikTok-ზე გავრცელებული თბილი და გულისამაჩუყებელი ვიდეოების სერია მოგვითხრობს საბერძნეთში მოხუცის პირველი სტუმრობის და მოგზაურობის დეტალებს.
კადრებში ნაჩვენებია ამაყი და ბედნიერი მოხუცი როგორ სეირნობს ქალაქგარეთ დაბინდებისას, ათვალიერებს ქვეყნის ცნობილ ისტორიულ ღირსშესანიშნაობებს, მათ შორის აკროპოლს, ეწვევა ბერძნულ მართლმადიდებლურ ეკლესიებს, ხეტიალობს კუნძულებზე და სვამს უზოს… ქვეყნის ყველაზე პოპულარულ ალკოჰოლურ სასმელს.
გავრცელებულ კადრებში განსაკუთრებით გამორჩეულია მომენტი, როდესაც ის მთის ფერდობზე ხმაურიან ტავერნაში, ბერძნული დროშით ხელში, მეგობრებთან და ნაცნობებთან ერთად ტრადიციულ ბერძნულ სტილში ცეკვის ოსტატობას აჩვენებს.
აღნიშნულ ვიდეოს თან ახლავს კომენტარი: „ჩვენს პაპუს 89 წელი დასჭირდა, მაგრამ ის საბოლოოდ საბერძნეთში მოხვდა!! არ შეიძლება არ იტირო მის წმინდა სიხარულზე და სიამაყეზე.”
საბერძნეთში “პაპუს” თავგადასავლების სერიამ ინტერნეტმომხმარებლებში დიდი აღფრთოვანება გამოიწვია. ვიდეო 109000-ზე მეტმა მომხმარებელმა მოიწონა და 1300-ზე მეტმა გააკეთა კომენტარი.
„ჩემს სულს ეს სჭირდებოდა. ის ძალიან ბედნიერი და კმაყოფილი გამოიყურება, იქ არის სადაც უნდა ყოფილიყო. მიყვარს“, – წერს ერთ-ერთი მომხმარებელი.
1890-1917 წლებში 450 000-მა ბერძენმა დატოვა სამშობლო და ჩავიდა შეერთებულ შტატებში. 1918-1924 წლებში მათ რიგებს კიდევ 70 000 ბერძენი შეუერთდა. მათი უმეტესობა შტატების ჩრდილო-აღმოსავლეთის ქალაქებში რკინიგზის მშენებლობაზე, ან დასავლეთ შეერთებული შტატების მაღაროებში, საკმაოდ მძიმე პირობებში მუშაობდა.
