American Airlines: პანიკა თვითმფრინავის ბორტზე ტექნიკური პრობლემის გამო
ფლორიდაში მიმავალი American Airlines-ის რეისის მგზავრებმა პანიკური შიში განიცადეს მას შემდეგ, რაც თვითმფრინავი სულ რაღაც სამ წუთში 15000 ფუტის სიმაღლეზე “ჩავარდა”, სალონში კი განგაშის ხმა ისმოდა და წვის სუნი იდგა.
American Airlines-ის რეისი 5916 ხუთშაბათს აფრინდა შარლოტადან, ჩრდილოეთ კაროლინადან და გაემართა გეინსვილის აეროპორტისკენ, როდესაც მოულოდნელად შეიქმნა პრობლემა სალონის წნევის სისტემასთან დაკავშირებით.
აფრენიდან დაახლოებით 43 წუთის შემდეგ, როდესაც ეკიპაჟმა შეიტყო პრობლემის შესახებ, პილოტმა დაიწყო თვითმფრინავის სწრაფად დაშვება დაბალ სიმაღლეზე, რათა უზრუნველყოფილიყო მგზავრების უსაფრთხოება.
ამასობაში სალონში, სადაც უკვე ჟანგბადის ნიღბები იყო გახსნილი, მგზავრების შფოთვამ პიკს მიაღწია.
ფლორიდის უნივერსიტეტის პროფესორმა, ჰარისონ ჰოვმა , რომელიც American Airlines-ის თვითმფრინავში იმყოფებოდა, ინციდენტს საშინელი უწოდა.
„ხშირად ვმოგზაურობ თვითმფრინავით. ძალიან საშინელი იყო. ვულოცავ American Air-ის რეისის 5916-ის გასაოცარ ეკიპაჟს და პილოტებს. ფოტოებს არ შეუძლიათ იმის გადმოცემა რაც განვიცადეთ”- წერს პროფესორი.
საბოლოოდ ყველაფერი კარგად დამთავრდა და თვითმფრინავი შემდგომი პრობლემების გარეშე დაეშვა გეინსვილის აეროპორტში.
