საბერძნეთის პრემიერ-მინისტრი კირიაკოს მიცოტაკისი ისრაელში ჩავიდა
საბერძნეთის პრემიერ მინისტრი კირიაკოს მიცოტაკისი დღეს(23/10) ჩავიდა ისრაელში, რათა გამოხატოს თავისი სოლიდარობა ქვეყანაში ჰამასის სასტიკი თავდასხმის შემდეგ და ხელი შეუწყოს ჰუმანიტარული დახმარების მიწოდების გაუმჯობესებას პალესტინელი მშვიდობიანი მოსახლეობისთვის ღაზაში. ის ისრაელის პრემიერ-მინისტრ ბენიამინ ნეთანიაჰუს შეხვდა. მისი ვიზიტი ისრაელში, რომელიც გასულ კვირას იყო დაგეგმილი, უსაფრთხოების მიზნით გადაიდო.
შაბათს კაიროს სამშვიდობო სამიტზე საბერძნეთის პრემიერმა ხაზგასმით აღნიშნა, რომ ისრაელსა და პალესტინელებს შორის კონფლიქტის მოგვარების სამშვიდობო პროცესი უნდა განახლდეს ორივე სახელმწიფოს მიერ მიღებული გადაწყვეტილების საფუძველზე.
“მთავარი გზავნილი, რომელიც დღეს უნდა გამოვგზავნოთ, არის ის, რომ ჩვენ ყველანი ვგმობთ ტერორიზმს მისი ყველა გამოვლინებით, ვგლოვობთ უდანაშაულო მშვიდობიანი მოსახლეობის დაღუპვას და ვწუხვართ ისრაელსა და ღაზაში ჰამასის მიერ 7 ოქტომბრის ტერაქტის შემდეგ მიყენებული ზიანის გამო” – თქვა მან
“ორივე მხრიდან არის უდანაშაულო მსხვერპლი, ხოლო მძევლები არიან მშვიდობიანი მოქალაქეები და არ იქნება სამშვიდობო მოლაპარაკებები, სანამ მათ არ გაათავისუფლებენ. საბერძნეთის პოზიცია თავიდანვე ნათელი იყო იმის თაობაზე, რომ ისრაელს აქვს თავდაცვის უფლება საერთაშორისო და ჰუმანიტარული სამართლის შესაბამისად.”
პრემიერმა ასევე აღნიშნა, რომ კოლექტიური სასჯელი აკრძალულია ომების მარეგულირებელი კანონებით და რომ ეს კანონმდებლობა შექმნილია იმისთვის, რომ უზრუნველყოს ზიანის ლიმიტი, რომელიც შეიძლება მიყენებული იქნეს აქტიური ომის დროს.
საბერძნეთის პრემიერ-მინისტრმა ასევე აღნიშნა, რომ ჰამასი არის ტერორისტული ორგანიზაცია, რომელიც იწვევს ზარალს და ტკივილს აყენებს როგორც ისრაელს, ასევე პალესტინელებს.
