გილოცავთ ახალი სასწავლო წლის დაწყებას!

საბერძნეთში დღეს, 11 სექტემბერს, ახალი სასწავლო წელი დაიწყო.

გილოცავთ ყველას-მოსწავლეებს, მშობლებს, პედაგოგებს და გისურვებთ, რომ ეს წელი ყოფილიყოს წარმატების მომტანი თითოეული თქვენგანისათვის.

განსაკუთრებული სითბოთი და სიყვარულით ვულოცავთ სასწავლო წლის დაწყებას პირველკლასელებს, რომლებიც დღეს პირველად შეაღებენ სკოლის კარს და მათ ცხოვრებაში ახალი, მნიშვნელოვანი ეტაპი დაიწყება. ეტაპი ახალი ცოდნის, ახალი გამოცდილების და ახალი მეგობრების შეძენისა.

საბერძნეთის სკოლებში 2023-2024 სასწავლო წლის და უშუალოდ სასწავლო პროცესის დაწყებამდე, სასკოლო ერთეულის დონეზე ხდება ყველა აუცილებელი მოსამზადებელი ქმედება, რომელიც დაკავშირებულია სკოლის ორგანიზაციასა და ფუნქციონირებასთან, ასევე საგანმანათლებლო პროექტების დაგეგმვასთან.

სწავლის დაწყების პირველ დღეს, დილის 08:30 საათზე, სკოლის ეზოში ტრადიციული კურთხევის ცერემონია იმართება, რომელსაც მოსწავლეები თითოეული სკოლის მიერ ინდივიდუალურად განსაზღვრული გეგმის მიხედვით ესწრებიან.

ამ დღეს მოსწავლეები ეცნობიან სასწავლო პროგრამას და სკოლის ფუნქციონირებასთან  დაკავშირებულ საკითხებს, ასევე ამ დღეს მოსწავლეებს ურიგდებათ სასწავლო წიგნები და ისინი ტოვებენ სკოლას, ხოლო სამშაბათიდან სწავლა ჩვეულ რეჟიმში დაიწყება.

გილოცავთ კიდევ ერთხელ და გისურვებთ ნაყოფიერ სასწავლო წელს!