კვიპროსი:10 წლის გოგონა საცურაო აუზიდან გარდაცვლილი გამოიყვანეს – დააკავეს დედა, რომელიც ნასვამ მდგომარეობაში იმყოფებოდა
კვიპროსში საცურაო აუზში მცირეწლოვანი ბავშვის დახრჩობის მორიგი შემთხვევა მოხდა. აია ნაპას სასახლის აუზში დამხრჩვალი 4 წლის ბიჭის შემდეგ, პაფოსის სასახლეში 10 წლის გოგონა გარდაიცვალა.
გოგონა გარდაცვლილი იპოვეს ხუთშაბათს, 20 ივლისს, ნაშუადღევს, პეგეას რაიონში მდებარე სასახლის საცურაო აუზში.
მდიდრული რეზიდენციის ვიზიტორებმა მომხდარის შესახებ პოლიციას აცნობეს, ხოლო ბავშვის დედას- რუსეთიდან ჩასულ 42 წლის ტურისტს, რომელიც პაფოსის პოლიციამ დააკავა, ტრაგედია არც შეუმჩნევია, რადგან ალკოჰოლის გადაჭარბებული მოხმარების გამო უგონო მდგომარეობაში იმყოფებოდა.
პატარა გოგონას ცხედარი სახანძრო სამსახურის წევრების დახმარებით აუზიდან ამოიყვანეს, 42 წლის დედა კი, რომელიც ჯერ კიდევ უგონო მდგომარეობაში იყო, სასწრაფო დახმარების მანქანით პაფოსის საავადმყოფოში გადაიყვანეს, სადაც აღმოჩნდა, რომ ის ნასვამ მდგომარეობაში იმყოფებოდა.
