საბერძნეთის პარლამენტი დაღუპული მფრინავების შვილებს იშვილებს

საბერძნეთის პარლამენტი დაღუპული მფრინავების შვილებს იშვილებს

საბერძნეთის პარლამენტი ფინანსური მხარდაჭერის მიზნით „იშვილებს“ იმ ორი სამხედრო მფრინავის შვილებს, რომლებიც 2026 წლის 5 სექტემბერს, ტანაღრაში, F-4 Phantom-ის ტიპის საბრძოლო თვითმფრინავის ჩამოვარდნის შედეგად დაიღუპნენ.

უბედური შემთხვევა Athens Flying Week 2026-ის ფარგლებში გამართული საჰაერო შოუს დროს მოხდა. ავიაკატასტროფას საჰაერო ძალების ორი სამხედრო მოსამსახურე ვიცე-პოლკოვნიკი იოანის ბლესიასი და მაიორი დიმიტრიოს პეტროსი ემსხვერპლა.

საბერძნეთის პარლამენტის თავმჯდომარის, ნიკიტას კაკლამანისის განცხადებით, დაღუპული მფრინავების შვილების „შვილად აყვანის“ პროცედურა უკვე დაწყებულია. შესაბამისი დოკუმენტაცია სახელმწიფო აუდიტის სამსახურს დასამტკიცებლად უკვე წარუდგინეს და პროცედურის დასრულება დაახლოებით ორ თვეშია მოსალოდნელი.

აღნიშნული ინიციატივა საბერძნეთის პარლამენტის არსებული პრაქტიკის ნაწილია, რომლის მიზანიც სამსახურებრივი მოვალეობის შესრულებისას დაღუპული შეიარაღებული ძალებისა და უსაფრთხოების სტრუქტურების თანამშრომლების შვილების მხარდაჭერას ემსახურება.

ამასთან, უკვე დასრულდა ივნისში, ასტროს კინურიასში, სამსახურებრივი მოვალეობის შესრულებისას დაღუპული სანაპირო დაცვის თანამშრომლის შვილის „შვილად აყვანის“ პროცედურაც. ბავშვს პარლამენტი ყოველწლიურად 10 000 ევროს გადაუხდის 25 წლის ასაკის შესრულებამდე. საერთო ჯამში, დახმარების ოდენობა 170 000 ევროს შეადგენს.