საბერძნეთი: ტემპერატურა პიკს აღწევს – ძლიერი ქარები ხანძრის გაჩენის რისკს ზრდის
საბერძნეთი: ტემპერატურა პიკს აღწევს – ძლიერი ქარები ხანძრის გაჩენის რისკს ზრდის
საბერძნეთში დღეს, 22 ივლისს, სიცხის ტალღის ბოლო და ყველაზე ცხელი დღეა. ქვეყნის ხუთ რეგიონში: ათენში, ფთიოტიდაში, ვიოტიაში, კორინთიასა და არღოლიდაში ხანძრის გაჩენის უკიდურესად მაღალი საფრთხის გამო გამოცხადებულია RED CODE განგაში.
სინოპტიკოსების პროგნოზით, დღის მეორე ნახევარში ჰაერის ტემპერატურა თესალიასა და ფთიოტიდაში 42–43°C-მდე, ხოლო ათენში, კრეტასა და დოდეკანისას კუნძულებზე 40–41°C-მდე მოიმატებს. ამასთან, მოსალოდნელია ძლიერი დასავლეთისა და სამხრეთ-დასავლეთის ქარები.
განსაკუთრებულ საფრთხეს წარმოადგენს Foehn-ის (ფიონის) ტიპის ქარი. ცხელი და მშრალი ქარი, რომელიც პინდოსის მთების გადავლის შემდეგ სწრაფად თბება და ჰაერის ტენიანობას მნიშვნელოვნად ამცირებს. ასეთი პირობები მცენარეებს სწრაფად აშრობს და ტყის ხანძრების გაჩენისა და გავრცელების რისკს მნიშვნელოვნად ზრდის.
დღის განმავლობაში საბერძნეთის ცენტრალურ და სამხრეთ ნაწილში აფრიკული მტვრის კონცენტრაციაც გაიზრდება. შუადღის შემდეგ მაკედონიაში, თრაკსა და ჩრდილოეთ ეგეოსის რეგიონში მოსალოდნელია წვიმა და ადგილობრივი ძლიერი ჭექა-ქუხილი, განსაკუთრებით მთიან რაიონებში.
სინოპტიკოსების მიერ გავრცელებული ინფორმაციის თანახმად, ხუთშაბათიდან 23 ივლისიდან, ტემპერატურა 8–10 გრადუსით დაიკლებს და ჩრდილოეთის ქარები გაძლიერდება. პარასკევს, 24 ივლისს ქვეყნის დიდ ნაწილში მოსალოდნელია ამინდის გაუარესება, წვიმა და ჭექა-ქუხილი, ხოლო შაბათიდან და განსაკუთრებით კვირას, 26 ივლისს ამინდი კვლავ გაუმჯობესდება და სეზონისთვის შედარებით გრილი ამინდები შენარჩუნდება.
