საბერძნეთი: ჯანმრთელობის სფეროს რამდენიმე დაწესებულებაში დარღვევები გამოვლინდა
საბერძნეთი: ჯანმრთელობის სფეროს რამდენიმე დაწესებულებაში დარღვევები გამოვლინდა
საბერძნეთის გამჭვირვალობის ეროვნულმა უწყებამ ჯანმრთელობის სფეროში ონლაინ გავრცელებული უკანონო რეკლამებისა და სამედიცინო მომსახურებების გამო შემოწმებები დაიწყო. უწყების მიერ ჩატარებული შემოწმებების პირველი შედეგები ჯანდაცვის მინისტრმა გაასაჯაროვა.
ამ ეტაპზე შემოწმებულია რამდენიმე დაწესებულება. ერთ-ერთ ბიოპათოლოგიის ექიმის კაბინეტში აღმოჩნდა ესთეტიკური პროცედურებისთვის განკუთვნილი საინექციო პრეპარატები, მათ შორის ჰიალურონის მჟავა, ფილერები და ეგზოსომები. ექიმმა შემოწმებისას პრეპარატების შეძენის დამადასტურებელი დოკუმენტაციის წარდგენა ვერ შეძლო. დაწესებულება სოციალურ ქსელშიც ესთეტიკური დერმატოლოგიის მომსახურებებს სთავაზობდა მომხმარებლებს.
ასევე შემოწმდა ნატუროპათიური მომსახურების ცენტრი, სადაც აღმოჩნდა ნაწლავის ჰიდროთერაპიის აპარატურა, ბიორეზონანსის მოწყობილობა, ასევე აპარატები ლიპოლიზისა და შინაგანი ცხიმის შემცირებისთვის.
ერთ-ერთ დაწესებულებაში, რომელიც საკუთარ თავს „კვანტური ბიოფიდბექის“ ცენტრად წარმოადგენდა, აღმოჩნდა სამი აპარატი, რომელთა მფლობელის განცხადებით, ისინი ორგანიზმში სტრესის წყაროების დასადგენად გამოიყენებოდა. შემოწმებისას ასევე გაირკვა, რომ მომსახურების მიმწოდებელს საბერძნეთში აღიარებული შესაბამისი განათლების დამადასტურებელი დიპლომი არ აქვს. სოციალურ ქსელში იგი საკუთარ სივრცეს „კლინიკად“ მოიხსენიებდა.
სხვა კერძო კლინიკაში აღმოჩნდა საინექციო პრეპარატები, აკუპუნქტურისთვის განკუთვნილი ნემსები და სხვადასხვა აპარატურა. შემოწმების დროს საინექციო პროცედურას მედდის დამხმარე ექიმის თანდასწრებით ატარებდა.
უწყების ინფორმაციით, შემოწმებების მიზანია ჯანმრთელობის სფეროში კანონიერების დაცვის უზრუნველყოფა და იმ შემთხვევების გამოვლენა, როდესაც სამედიცინო ან ალტერნატიული მომსახურება შესაბამისი ნებართვისა და კვალიფიკაციის გარეშე ხორციელდება.
