ტების ტრაგედიასთან დაკავშირებული სასამართლო პროცესი გრძელდება

ტების ტრაგედიასთან დაკავშირებული სასამართლო პროცესი გრძელდება

ტების ტრაგედიასთან დაკავშირებული სასამართლო პრიცესი ივლისში გამოცხადებული შესვენების შემდეგ გრძელდება.

საქმეზე სულ 36 ბრალდებულია, რომელთაგან 33-ს განსაკუთრებით მძიმე დანაშაულში ედება ბრალი. მათ შორის არიან საბერძნეთის ტრანსპორტის სამინისტროსა და რკინიგზის ორგანიზაციების, ΟΣΕ-ს ყოფილი და მოქმედი თანამშრომლები.

სხდომის მიმდინარე ეტაპზე სასამართლო ბრალდებულთა ადვოკატების პოზიციებსა და არგუმენტებს ისმენს. ადვოკატები ბრალდებებს უარყოფენ და მათი დაცვის ქვეშ მყოფი პირების უდანაშაულობაზე საუბრობენ. დაცვის მხარის მიერ წარდგენილი არგუმენტების შემდეგ სასამართლო პროცესზე სიტყვით გამოვა პროკურორი, რომელიც ბრალდების მხარის პოზიციას წარმოადგენს.

შემდეგ ეტაპზე სასამართლო მოწმეების დაკითხვაზე გადავა. პირველ მოწმეებს შორის იქნებიან ტების ტრაგედიის დროს დაღუპული მემანქანის, დიმიტრი კუცუმბას, ოჯახის წევრები.

სხდომას ესწრება ექვსი ბრალდებული: დიმიტრიოს ნიკოლაუ, იოანის პალეოთოდოროსი, დიონისიოს რაპოსი, სპიროს პატერასი, აპოსტოლოს ცაკირი და პავლოს კუზისი.

ერთ-ერთმა ბრალდებულმა, სადგურის უფროსების ინსპექტორმა დიმიტრი ნიკოლაუმ სასამართლოში განაცხადა, რომ მისი მიზანი სრული სამართლიანობის მიღწევა და საკუთარი უდანაშაულობის დამტკიცებაა. მისი თქმით, ის კანონის ფარგლებში მოქმედებდა.

ტების სარკინიგზო ტრაგედია 2023 წლის 28 თებერვალს მოხდა, როდესაც სამგზავრო და სატვირთო მატარებლები ერთმანეთს შეეჯახნენ. კატასტროფას ათობით ადამიანი ემსხვერპლა და საბერძნეთის უახლეს ისტორიაში ერთ-ერთ ყველაზე მძიმე სარკინიგზო ტრაგედიად იქცა.