იონიის ზღვაში მეორე მსოფლიო ომის დროინდელი იშვიათი გერმანული სამხედრო ხომალდი აღმოაჩინეს
იონიის ზღვაში მეორე მსოფლიო ომის დროინდელი იშვიათი გერმანული სამხედრო ხომალდი აღმოაჩინეს
83 წლის შემდეგ, იონიის ზღვის ფსკერზე მეორე მსოფლიო ომის პერიოდის იშვიათი გერმანული სამხედრო კატარღა LS 6 აღმოაჩინეს. ისტორიკოსების შეფასებით ის მსოფლიოში Leichte Schnellboot-ის კლასის ერთადერთი შემორჩენილი ხომალდია.
აღმოჩენა მრავალწლიანი კვლევის შედეგია, რომელიც 13 წლის წინ დაიწყო. გერმანიის სამხედრო არქივებში აღმოჩენილი დოკუმენტების საფუძველზე მკვლევრებმა დაადგინეს სავარაუდო ადგილი, სადაც 1943 წლის სექტემბერში, კორფუდან პირეასკენ ბუქსირების დროს, ხომალდი ჩაიძირა.
საბოლოოდ, პრევეზას სანაპიროსთან დაახლოებით 96 მეტრის სიღრმეზე, მყვინთავთა ჯგუფმა ხომალდი თითქმის ხელუხლებელ მდგომარეობაში აღმოაჩინა. მისი იდენტიფიცირება შესაძლებელი გახდა კორპუსის კონსტრუქციის, Junkers Jumo-ს ძრავების, ზომებისა და ბუქსირების თოკის მეშვეობით, რომელიც დღემდე ხომალდის ცხვირთანაა შემორჩენილი.
ისტორიული ცნობებით, LS 6 ეგეოსის ზღვაში გერმანიის სამხედრო-საზღვაო ძალების ოპერაციებში უნდა ჩართულიყო, თუმცა ბრიტანული ავიაციის შეტევის შედეგად დაზიანდა. პირეაზე სარემონტოდ გადაყვანისას ხომალდის ალუმინის კორპუსმა დატვირთვას ვერ გაუძლო, წყალმა ბორტზე შეაღწია და პრევეზასთან ჩაიძირა.
სპეციალისტების შეფასებით აღმოჩენა განსაკუთრებული მნიშვნელობის არის, რადგან ხომალდის შესანიშნავი მდგომარეობა ისტორიკოსებსა და საზღვაო არქეოლოგებს მეორე მსოფლიო ომის გერმანული სამხედრო ტექნიკის შესწავლის უნიკალურ შესაძლებლობას აძლევს. ამავდროულად, აღმოჩენა კიდევ ერთხელ უსვამს ხაზს საბერძნეთის წყალქვეშა კულტურული მემკვიდრეობის განსაკუთრებულ მნიშვნელობას.
