კვიპროსის ცნობილი ჰალუმი – ტრადიცია, რომელიც საუკუნეებს ითვლის

ჰალუმი კვიპროსის ერთ-ერთი ყველაზე ცნობილი და გამორჩეული პროდუქტია. მისი დამზადების ტრადიცია შუა საუკუნეებიდან იღებს სათავეს, დღეს კი ევროკავშირის მიერ დაცული გეოგრაფიული აღნიშვნის სტატუსი აქვს, რაც მას ავთენტურობის შენარჩუნებაში ეხმარება.

ხარულა კუპარისი ჰალუმის დამზადების მესამე თაობის ოსტატია, ამბობს, რომ მათი ოჯახის წარმატების მთავარი საიდუმლო მაღალი ხარისხის ნედლეული და ტრადიციული მეთოდებია. მისი თქმით, ყველის დასამზადებლად მხოლოდ საკუთარი ფერმის რძეს იყენებენ, ხოლო განსაკუთრებული გემოს მისაღებად ნარევს ზღვის წყალს უმატებენ.

ჰალუმი ძირითადად ცხვრისა და თხის რძისგან მზადდება, ზოგჯერ კი ძროხის რძეც ემატება. მისი წარმოების პროცესში შედედებული ყველი ჯერ ფორმებში იწურება, შემდეგ კი შრატში იხარშება, რაც მას ელასტიკურ სტრუქტურას ანიჭებს. სწორედ ამიტომ ჰალუმი შეწვისა და გრილზე მომზადებისას არ დნება. საბოლოოდ მას მარილით ამუშავებენ, შიგნით პიტნის ფოთლებს ათავსებენ და მარილწყალში აძველებენ, რაც მის უნიკალურ არომატსა და გემოს აყალიბებს.

მიუხედავად იმისა, რომ მწარმოებლები გარკვეულ სირთულეებს აწყდებიან, ჰალუმი მსოფლიოში კვლავ დიდი პოპულარობით სარგებლობს და კვიპროსის გასტრონომიის ერთ-ერთ მთავარ სიმბოლოდ რჩება.