საბერძნეთის პოლიცია 28 მილიონიანი საგადასახადო თაღლითობის საქმეს იძიებს
საბერძნეთის პოლიცია 28 მილიონიანი საგადასახადო თაღლითობის საქმეს იძიებს
საბერძნეთში საგადასახადო თაღლითობის მასშტაბური სქემა გამოავლინეს, რომლის შედეგადაც სახელმწიფო ბიუჯეტმა 28 მილიონი ევროს ზარალი განიცადა, ხოლო ორგანიზებულმა ჯგუფმა უკანონოდ 4,8 მილიონი ევრო მიიღო.
გამოძიების მასალების თანახმად, სქემა დღგ-ს გადაუხდელობას, ყალბი ინვოისების გამოყენებასა და არასწორი საგადასახადო დეკლარაციების წარდგენას მოიცავდა. თაღლითურ ოპერაციებში რამდენიმე ბუღალტერი და ორი ბანკის ფილიალის ხელმძღვანელიც მონაწილეობდა, რომლებიც გადასახადების უკანონო დაბრუნებას უწყობდნენ ხელს.
ერთ-ერთმა ბუღალტერმა გამოძიებას განუცხადა, რომ მისმა პარტნიორმა კომპანიების საგადასახადო დეკლარაციების წარდგენა სთხოვა და თითოეულში დაახლოებით 5 000 ევროს ჰპირდებოდა. ქალის თქმით, მან უარი განაცხადა, თუმცა პარტნიორმა მისი არყოფნით ისარგებლა, ოფისში გადასახადის გადამხდელის კოდები იპოვა და დეკლარაციები მისი ნებართვის გარეშე წარადგინა.
საქმეზე 15 პირია დაკავებული, რომელთაგან რვა აღრინიოს რეგიონში აიყვანეს. მათ ბრალი ექვსი მძიმე დანაშაულის მუხლით წარედგინათ, მათ შორის კრიმინალური ორგანიზაციის შექმნის, გადასახადებისგან თავის არიდების, სახელმწიფოს თაღლითობისა და ფულის გათეთრების ბრალდებებით.
