საბერძნეთი: ემიგრაციაში წასული კვალიფიციური კადრები სამშობლოში ბრუნდებიან
საბერძნეთი: ემიგრაციაში წასული კვალიფიციური კადრები სამშობლოში ბრუნდებიან
გერმანული გამოცემა Handelsblatt წერს, რომ საბერძნეთი მნიშვნელოვან წარმატებას აღწევს ე.წ. „Brain Gain“-ის მიმართულებით. ქვეყანაში უკვე დაბრუნდა იმ მოქალაქეების თითქმის ორი მესამედი, რომლებმაც ეკონომიკური კრიზისის წლებში ემიგრაცია აირჩიეს.
გამოცემის ინფორმაციით, 2019 წლიდან საბერძნეთის მთავრობა აქტიურად ახორციელებს სხვადასხვა პროგრამას კვალიფიციური სპეციალისტების დასაბრუნებლად. მათ შორისაა საგადასახადო შეღავათები, ბიზნესისთვის სუბსიდიები, დასაქმების პლატფორმები და საზღვარგარეთ საინფორმაციო კამპანიები.
თუმცა, ΟΟΣΑ-სა და საბერძნეთის ეროვნული დოკუმენტაციის ცენტრის (EKT) ერთობლივი კვლევის მიხედვით, სამშობლოში დაბრუნების მთავარი მიზეზი მხოლოდ ფინანსური სარგებელი არ არის. გადამწყვეტ როლს თამაშობს ოჯახთან სიახლოვე, ცხოვრების ხარისხი და ემოციური კავშირი საკუთარ ქვეყანასთან.
საბერძნეთის შრომის მინისტრის, ნიკი კერამეოსის განცხადებით, ბოლო 15 წლის განმავლობაში ქვეყანა დაახლოებით 734 000 ადამიანმა დატოვა, თუმცა მათგან 473 000 უკან დაბრუნდა. 2024 წელს დაბრუნებულთა რაოდენობამ ემიგრანტთა რაოდენობას დაახლოებით 20 000 ადამიანით გადააჭარბა, რაც, მთავრობის შეფასებით, „ტვინების გადინების“ (Brain Drain) ნაცვლად უკვე „ტვინების დაბრუნების“ (Brain Gain) ტენდენციაზე მიუთითებს.
კვლევის თანახმად, დაბრუნებულთა ნახევარზე მეტი 20-39 წლის ასაკისაა, დაახლოებით 60%-ს უმაღლესი განათლება აქვს, ხოლო 47% მაღალკვალიფიციურ პროფესიულ სფეროებშია დასაქმებული.
მიუხედავად ამ დადებითი ტენდენციისა, Handelsblatt აღნიშნავს, რომ საბერძნეთი კვლავ ჩამორჩება ევროკავშირის ქვეყნებს ანაზღაურების დონით. ოფიციალური ევროპული სტატისტიკის მიხედვით, მაღალკვალიფიციური სპეციალისტები ქვეყანაში საშუალოდ 43%-ით ნაკლებ ხელფასს იღებენ, ვიდრე ევროკავშირის საშუალო მაჩვენებელია.
