საბერძნეთი: უხილავი საფრთხე, რომელიც ინტერნეტისა და საფოსტო გზავნილების მეშვეობით აღწევს წვეულებებზე
საბერძნეთი: უხილავი საფრთხე, რომელიც ინტერნეტისა და საფოსტო გზავნილების მეშვეობით აღწევს წვეულებებზე
საბერძნეთში, კერძოდ სალონიკში, 20 წლის გოგონას გარდაცვალების შემდეგ, რომელმაც მუსიკალურ წვეულებაზე MDMA მიიღო, სპეციალისტები სინთეზური ნარკოტიკების მოხმარების საფრთხეებზე საუბრობენ.
ორგანიზებული დანაშაულის წინააღმდეგ ბრძოლის სამმართველოს ნარკოტიკებთან ბრძოლის განყოფილების ხელმძღვანელის, იანნის კარიდაკოსის განცხადებით, ერთ-ერთი მთავარი საფრთხე ნარკოტიკული ნივთიერებების უცნობი შემადგენლობაა. მომხმარებლებმა ხშირად არ იციან, რა აქტიურ ნივთიერებებს ან რა დოზით შეიცავს მათ მიერ მიღებული პროდუქტი, რაც მძიმე მოწამვლისა და უეცარი გარდაცვალების რისკს ზრდის.
საბერძნეთში გავრცელებულ სინთეზურ ნარკოტიკებს შორისაა MDMA, რომელიც „ექსტაზის“ სახელითაც არის ცნობილი. მისმა მოხმარებამ შესაძლოა გამოიწვიოს სხეულის ტემპერატურის სახიფათო მატება, გულ-სისხლძარღვთა გართულებები და ორგანიზმში სითხისა და ელექტროლიტების ბალანსის დარღვევა.
განსაკუთრებულ შეშფოთებას იწვევს ე.წ. „ვარდისფერი კოკაინიც“. მიუხედავად სახელწოდებისა, ის ხშირად კოკაინს საერთოდ არ შეიცავს და სხვადასხვა ფსიქოაქტიური ნივთიერების ნარევს წარმოადგენს. მისი შემადგენლობა პარტიების მიხედვით იცვლება, რის გამოც ზუსტი მოქმედებისა და ჯანმრთელობისთვის მიყენებული ზიანის წინასწარ განსაზღვრა შეუძლებელია.
პოლიციის ინფორმაციით, სინთეზური ნარკოტიკები საბერძნეთში, მათ შორის, საფოსტო გზავნილებისა და ინტერნეტის საშუალებითაც ხვდება. მათი ნაწილი ევროპის სხვა ქვეყნებში იწარმოება.
სპეციალისტები ხაზგასმით აღნიშნავენ, რომ უცნობი შემადგენლობის ნარკოტიკების მოხმარება შესაძლოა სიცოცხლისთვის სახიფათო აღმოჩნდეს, რადგან მომხმარებელი ვერ განსაზღვრავს მიღებული ნივთიერების რეალურ შემადგენლობასა და მოქმედების სიმძლავრეს.
