ტრაგედია ევროსში: დადიას ტყეში 18 ადამიანის დანახშირებული ცხედარი იპოვეს
ალექსანდრუპოლის ჩრდილოეთით, ევროსის რეგიონში, იქ სადაც ტყის უზარმაზარი მასივი იწვის, სოფელ დადიასთან მეხანძრეებმა თვრამეტი ადამიანის დანახშირებული ცხედარი აღმოაჩინეს.
ვარაუდობენ, რომ ისინი ეკუთვნიან არალეგალ მიგრანტებს, რომლებმაც ცოტა ხნის წინ გადმოკვეთეს თურქეთის საზღვარი.
პოლიციის განცხადებით, იმის გათვალისწინებით, რომ დაკარგულების შესახებ ინფორმაცია არ არსებობს, ვარაუდობენ, რომ მსხვერპლი ემიგრანტები არიან. დაღუპულთა ეროვნება ჯერჯერობით უცნობია.
დადიას ტერიტორია, რომელიც ეროვნულ პარკში მდებარეობს, ცნობილია, როგორც არალეგალი მიგრანტების გადასაყვანი ერთ-ერთი მარშრუტი.
ხანძარი დადიას ტყეში ორშაბათს (21/8), შუადღისას გაჩნდა და მეხანძრე-მაშველები მის გავრცელებამდე ცდილობდნენ ცეცხლის ლიკვიდაციას.
EL.AS-ის შტაბიდან ამ დროისთვის საგამოძიებო მოქმედებები მთელს ტერიტორიაზე მიმდინარეობს, გააქტიურებულია კატასტროფის იდენტიფიკაციის ჯგუფი.
