ჯავედ ასლამს საბერძნეთში თავშესაფრის სტატუსი შეუნარჩუნდა – ემიგრაციის სამინისტრომ ჯავედ ასლამის გასაჩივრების განაცხადი მიიღო
ჯავედ ასლამს საბერძნეთში თავშესაფრის სტატუსი შეუნარჩუნდა – ემიგრაციის სამინისტრომ ჯავედ ასლამის გასაჩივრების განაცხადი მიიღო
საბერძნეთის თავშესაფრის საკითხთა სააპელაციო კომიტეტმა დააკმაყოფილა ჯავედ ასლამის, საბერძნეთის პაკისტანური თემის ორგანიზაცია „ΕΝΟΤΗΤΑ“-ს პრეზიდენტის, საჩივარი და გააუქმა ემიგრაციისა და თავშესაფრის სამინისტროს მიერ მიღებული გადაწყვეტილება, რომლითაც მას საერთაშორისო დაცვის (თავშესაფრის) სტატუსი ჩამოართვეს.
კომიტეტის გადაწყვეტილებას არ ეთანხმება ემიგრაციის მინისტრი. ემიგრაციისა და თავშესაფრის სამინისტროს მიერ გავრცელებული ინფორმაციის თანახმად, ემიგრაციის მინისტრმა, თანოს პლევრისმა შესაბამის სამსახურებს დაავალა, დაუყოვნებლივ შეიტანონ სასამართლოში გადაწყვეტილების გაუქმების მოთხოვნა. ემიგრაციის სამინისტროს განცხადებით, სააპელაციო კომიტეტის გადაწყვეტილება შეიცავს სამართლებრივ ხარვეზებს, სათანადოდ არ პასუხობს თავშესაფრის გაუქმების საფუძვლებს და არ ითვალისწინებს სამინისტროს პოზიციას, რომლის მიხედვითაც პაკისტანი უსაფრთხო ქვეყნად მიიჩნევა.
სამინისტრო ასევე აღნიშნავს, რომ პაკისტანის მოქალაქეებისთვის თავშესაფრის მინიჭების მაჩვენებელი საბერძნეთში 1%-ზე ნაკლებია, რის გამოც აღნიშნული გადაწყვეტილება განსაკუთრებით პრობლემურად მიაჩნიათ. უწყებაში ხაზგასმით აცხადებენ, რომ გამოიყენებენ ყველა სამართლებრივ გზას, რათა აღნიშნული გადაწყვეტილება შეიცვალოს.
ამავე დროს, სამინისტროს წყაროებმა ბერძნულ მედიასთან განაცხადეს, რომ მათი შეფასებით, ეს გადაწყვეტილება შეიძლება გახდეს პრეცედენტი, რომელიც მომავალში პაკისტანის მოქალაქეებს თავშესაფრის მიღების შესაძლებლობას გაუმარტივებს.
