2023 წლის ნობელის პრემია მშვიდობის დარგში ირანელ ნარგის მოჰამადს გადაეცა
ცნობილი გახდა, რომ ირანელ ქალთა უფლებების დამცველ აქტივისტს, პატიმრობაში მყოფ ნარგის მოჰამადს მიენიჭა 2023 წლის ნობელის პრემია მშვიდობის დარგში, რამაც შესაძლოა თეირანის აღშფოთება გამოიწვიოს.
ნობელის კომიტეტმა ირანს მოუწოდა გაათავისუფლოს მოჰამადი, ადამიანის უფლებათა დამცველი ერთ-ერთი ყველაზე ცნობილი ირანელი აქტივისტი, რომელიც იბრძვის ქალთა უფლებებისთვის და სიკვდილით დასჯის გაუქმებისთვის.
„ნორვეგიის ნობელის კომიტეტმა გადაწყვიტა ნარგის მოჰამადის 2023 წლის მშვიდობის ნობელის პრემია გადასცეს ირანში ქალების ჩაგვრის წინააღმდეგ ბრძოლისთვის და ადამიანის უფლებებისა და თავისუფლებისათვის ბრძოლაში ხელშეწყობისთვის“, – თქვა კომიტეტის თავმჯდომარემ ბერიტ რაის-ანდერსენმა.
”მხოლოდ ყველასთვის თანაბარი უფლებების მიღებით, მსოფლიო შეძლებს მიაღწიოს ძმობას ერებს შორის, ეს არის იდეა, რომლის ხელშეწყობაც სურდა ნობელის პრემიის დამფუძნებელს ალფრედ ნობელს,” – თქვა მან.
მოჰამადის ჯილდო არის “მნიშვნელოვანი ისტორიული მომენტი ირანში თავისუფლებისთვის ბრძოლაში”, – ნათქვამია მისი ოჯახის ტექსტურ შეტყობინებაში. „ჩვენ ვუძღვნით ამ ჯილდოს ყველა ირანელს და განსაკუთრებით ირანში მცხოვრებ ქალებსა და გოგონებს, რომლებიც შთაგონების წყაროა მთელი მსოფლიოსთვის მათი გამბედაობითა და ბრძოლით თანასწორობისთვის“, – დასძინა ოჯახმა.
„სამწუხაროდ, ნარგისი ჩვენთან ვერ იქნება ამ არაჩვეულებრივი მომენტის გასაზიარებლად“, – დასძინა ოჯახმა. „როგორც ნარგისი ყოველთვის ამბობს: გამარჯვება ადვილი მისაღწევი არ არის, მაგრამ შესაძლებელია“.
გაეროს ადამიანის უფლებათა უმაღლესი კომისრის ოფისმა (OHCHR) განაცხადა, რომ მოჰამადის ნობელის პრემია ხაზს უსვამს ირანელი ქალების გამბედაობასა და მონდომებას თავისუფლებისა და თანასწორობისათვის ბრძოლაში.
