30 ივნისი: დღეს ლიფტების რეგისტრაციის ბოლო ვადაა – დარღვევისთვის სოლიდური ჯარიმებია გათვალისწინებული
30 ივნისი: დღეს ლიფტების რეგისტრაციის ბოლო ვადაა – დარღვევისთვის სოლიდური ჯარიმებია გათვალისწინებული
საბერძნეთის განვითარების სამინისტრო მოქალაქეებს შეახსენებს, რომ ლიფტების სავალდებულო ელექტრონული რეგისტრაციის ბოლო ვადა 2026 წლის 30 ივნისია. ხელისუფლების განცხადებით, ვადა აღარ გადაიდება, ამიტომ ყველა მფლობელმა და შენობის ადმინისტრატორმა რეგისტრაცია დროულად უნდა დაასრულოს.
რეგისტრაცია უფასოა და სპეციალურ ელექტრონულ პლატფორმაზე Taxisnet-ის კოდების გამოყენებით ხორციელდება. პროცედურა რამდენიმე წუთს გრძელდება და ყველა ტიპის ლიფტს ეხება – მრავალბინიან და კერძო საცხოვრებელ სახლებში, სასტუმროებში, ოფისებში, სავაჭრო ცენტრებსა და სხვა კომერციულ თუ შერეული დანიშნულების შენობებში. რეგისტრაცია აუცილებელია იმ შემთხვევაშიც, თუ ლიფტი უკვე სერტიფიცირებულია ან ადრე სხვა რეესტრში იყო შეტანილი.
სამინისტრო განსაკუთრებულ ყურადღებას ამახვილებს იმ ფაქტზე, რომ მხოლოდ განაცხადის დროებითი შენახვა საკმარისი არ არის – აუცილებელია მისი საბოლოო დადასტურება, რის შემდეგაც სისტემა გასცემს უნიკალურ საიდენტიფიკაციო ნომერს.
30 ივნისის შემდეგ დაურეგისტრირებელი ლიფტების მფლობელებს ჯარიმები დაეკისრებათ: 1 000 ევრო – საცხოვრებელი შენობებისთვის, 2 500 ევრო – კომერციული ან შერეული დანიშნულების შენობებისთვის და 5 000 ევრო – საზოგადოებისთვის ხელმისაწვდომი ობიექტებისთვის.
1-ლი ივლისიდან რეგისტრაციის ნომერი ლიფტის ოფიციალური ტექნიკური იდენტიფიკაციის ნაწილი გახდება და მისი მითითება ტექნიკური მომსახურების ყველა დოკუმენტში სავალდებულო იქნება. შესაბამისად, დაურეგისტრირებელი ლიფტების კანონიერად ტექნიკური მომსახურება ვეღარ განხორციელდება, ვიდრე რეგისტრაცია არ დასრულდება და შესაბამისი ჯარიმა არ გადაიხდება.
