იტალია: ცირკიდან გაქცეული ლომი რამდენიმე საათის განმავლობაში თავისუფლად გადაადგილდებოდა ქალაქის ქუჩებში
შაბათს, 11 ნოემბერს იტალიაში, რომიდან დაახლოებით 41 კილომეტრში მდებარე ქალაქ ლადისპოლის ცირკიდან ლომი გაიქცა, რომელიც რამდენიმე საათის განმავლობაში თავისუფლად გადაადგილდებოდა პატარა ქალაქში მანამდე, სანამ დაიჭერდნენ. მომხდარმა ადგილორივ მოსახლეობაში შიში და პანიკა გამოიწვია. ლომის გაქცევას ხელისუფლების მხრიდან დაუყოვნებელი რეაგირება და ცხოველთა უფლებების დამცველების რეაქცია მოჰყვა.
ცხოველების მომვლელმა, რონი ვასალომ, AFP-ს აცნობა, რომ რვა წლის კიმბა არ წარმოადგენდა საფრთხეს საზოგადოებისთვის. ვასალოს თქმით, მიუხედავად ადამიანებთან უცნობ გარემოში ყოფნისა, ლომი არ ამჟღავნებდა აგრესიულ ქცევას და თავდასხმისკენ მიდრეკილებას.
გაქცევის გარემოებების ძიება ამ დრომდე მიმდინარეობს. გავრცელებული ინფორმაციით, ცირკის თანამშრომლებმა ლომის გალიის გატეხილი საკეტი აღმოაჩინეს.
პირველი წარუმატებელი მცდელობისას, მისი დაჭერის გასაადვილებლად, ვეტერინარებმა გამოიყენეს ისარი, რომელიც გეოლოკატორით იყო აღჭურვილი. საბოლოოდ ცხოველი ერთ-ერთი სკოლის მახლობლად იპოვეს.
მომხდართან დაკავშირებით განცხადების გაკეთებისას ცხოველთა დაცვის ორგანიზაციამ ხაზი გაუსვა დისკომფორტს, რომელსაც განიცდიან ცხოველები, როდესაც ადამიანები გართობის მიზნით მათ გალიებში ათავსებენ და იმედი გამოთქვა ცირკში ცხოველების გამოყვანის აკრძალვის კანონის შემოღების შესახებ.
ზოგადად ცირკებში ცხოველების გამოყენება აკრძალულია ევროპის ოცზე მეტ ქვეყანაში, მათ შორის საბერძნეთშიც. აკრძალვის შესახებ კანონი ამოქმედდა ათზე მეტი წლის წინ, 2012 წელს. უფრო მეტიც, საბერძნეთი იყო ევროპაში პირველი ქვეყანა, რომელმაც აღნიშნული კანონი მიიღო.
