აშშ: ბაიდენის შვილიშვილის დაცვის წევრმა ავტომანქანების გამტაცებლებს ცეცხლი გაუხსნა

აშშ-ის საიდუმლო სამსახურის აგენტმა, რომელიც ჯო ბაიდენის შვილიშვილის, ნაომი ბაიდენის დაცვის ჯგუფის წევრია, ესროლა სამ ადამიანს, რომლებიც 12 ნოემბერს, ჯორჯთაუნში, სამთავრობო მანქანაში შეღწევას ცდილობდნენ.

საიდუმლო სამსახურის სპიკერმა ენტონი გუგლიელმა განაცხადა, რომ დაცვის წევრები დაუპირისპირდნენ პირებს, რომლებმაც ჩაამტვრიეს გაჩერებული სამთავრობო მანქანის ფანჯარა. დაპირისპირების დროს ფედერალურმა აგენტმა თავისი სამსახურებრივი იარაღი გამოიყენა. სავარაუდოდ სროლის შედეგად არავინ დაშავებულა.

დამნაშავეები შემთხვევის ადგილიდან სწრაფად მიიმალნენ წითელი მანქანით. დაუყოვნებლივ გაიცა სამართალდამცავი ქვედანაყოფებისთვის მათი დაკავების ბრძანება. საიდუმლო სამსახურმა ხაზგასმით აღნიშნა, რომ მათი დაცვის ქვეშ მყოფ პირებს საფრთხე არ ემუქრებოდათ.

ინციდენტის შესახებ პირველად Associated Press-მა გაავრცელა. გუგლიელის განცხადებით, ინციდენტის გამოძიება DC მეტროპოლიტენის პოლიციის დეპარტამენტის და საიდუმლო სამსახურის ერთობლივი თანამშრომლობით მიმდინარეობს.