ათენის ქუჩებში კიდევ 388 კამერა დამონტაჟდა
ათენის ქუჩებში კიდევ 388 კამერა დამონტაჟდა
ატიკის რეგიონმა ათენისა და მიმდებარე რაიონების შერჩეულ გზაჯვარედინებზე 388 ავტომატური კამერის დამონტაჟების სამუშაოები დაასრულა. კამერები 24 საათის განმავლობაში იმუშავებენ და დააფიქსირებენ მძღოლებს, რომლებიც შუქნიშნის წითელ ნიშანას არ დაემორჩილებიან.
კამერების განთავსების ადგილები შეარჩია ატიკის საგზაო პოლიციამ იმ მონაკვეთებზე, სადაც წითელზე გავლის გამო ყველაზე ხშირად ხდება ავარიები.
პროექტის ღირებულებამ 13,38 მილიონი ევრო შეადგინა (დღგ-ს გარეშე) და დაფინანსდა ევროკავშირის აღდგენისა და მდგრადობის ფონდის პროგრამის ფარგლებში.
კამერები მხოლოდ საგზაო დარღვევებს დააფიქსირებენ და პოლიციას გადასცემენ მაღალი ხარისხის მტკიცებულებებს: ექვს ფოტოსა და ერთ ვიდეოჩანაწერს. ამასთან, პირადი მონაცემების დაცვის მიზნით, მანქანაში მყოფი ადამიანების ამოცნობა შეუძლებელი იქნება.
სისტემის სრულად ამოქმედებისთვის ატიკის რეგიონი თანამშრომლობს ციფრული მმართველობის სამინისტროსა და საბერძნეთის პოლიციასთან.
ატიკის გუბერნატორის ნიკოს ხარდალიასის განცხადებით, აღნიშნული პროექტი არ არის ჯარიმების გაზრდაზე ორიენტირებული, არამედ მიზნად ისახავს საგზაო უსაფრთხოების გაუმჯობესებას და ადამიანების სიცოცხლის დაცვას.
388 კამერის პროექტი ატიკის რეგიონში საგზაო უსაფრთხოების ფართო გეგმის ნაწილია, რომელიც მოიცავს 31 პროექტს, საერთო ბიუჯეტით 192,9 მილიონი ევრო. მთავარი მიზანია ავარიების შემცირება და უფრო უსაფრთხო გადაადგილების პირობების შექმნა მძღოლებისთვის, ქვეითებისა და ველოსიპედისტებისთვის.
