სალონიკი ზეთის ხილის მოსავალს იღებს

სალონიკი ზეთის ხილის მოსავალს იღებს

სალონიკის მუნიციპალიტეტის გარემოს დაცვის სამსახურმა ქალაქის სხვადასხვა უბანში არსებული 620 ზეთისხილის ხის ნაყოფის შეგროვება დაიწყო.

ზეთისხილის მოსავალს ზედიზედ მესამე წელია იღებენ. წლევანდელი მოსავალი განსაკუთრებით უხვად შეფასდა. წინასწარი გათვლებით, დაახლოებით 1,5 ტონა ზეთისხილის შეგროვებაა მოსალოდნელი, საიდანაც 150-დან 200 კილოგრამამდე უმაღლესი ხარისხის ექსტრა ვირჯინ ზეითუნის ზეთი მიიღება.

სამუშაოები სალონიკის მერიის შენობის ეზოში მდებარე ზეთისხილის ხეებიდან დაიწყო. თანამშრომლებმა ხეების ქვეშ სპეციალური ბადეები გაშალეს და მოსავლის შეგროვებას შეუდგნენ. პროცესს სალონიკის მერი სტელიოს ანგელუდისი და გარემოს დაცვის საკითხებში პასუხისმგებელი მერის მოადგილე ვასილის დიამანდაკისი ესწრებოდნენ. მათ მუნიციპალიტეტის თანამშრომლებს გაწეული შრომისთვის მადლობა გადაუხადეს.

წარმოებული ზეთი ხარისხის აუცილებელ შემოწმებასა და სერტიფიცირებას გაივლის, რის შემდეგაც სოციალური მაღაზიის მეშვეობით სოციალურად დაუცველ ოჯახებსა და მუნიციპალიტეტის საბავშვო ბაღებს გადაეცემა.

სალონიკის მერმა სტელიოს ანგელუდისმა აღნიშნა, რომ წლევანდელი მოსავალი წინა წლებთან შედარებით უკეთესია.

მისი თქმით, ყოველწლიურად სპეციალური შეფუთვით დამზადებული ზეთი სოციალური მაღაზიისა და საბავშვო ბაღებისთვის ნაწილდება. მან ასევე ხაზი გაუსვა, რომ ინიციატივის მნიშვნელობა მხოლოდ წარმოებული ზეთის რაოდენობით არ განისაზღვრება.

მერის განცხადებით, პროექტი მნიშვნელოვან გზავნილს ავრცელებს გარემოს დაცვის მიმართულებით და აჩვენებს, რომ დიდ ქალაქებშიც შესაძლებელია ნაყოფის მომცემი ხეების გაშენება და ბუნებრივი რესურსების სასარგებლოდ გამოყენება.

გარემოს დაცვის, ურბანული გამწვანებისა და ფაუნის საკითხებში მერის მოადგილემ, ვასილის დიამანდაკისმა განმარტა, რომ მუნიციპალიტეტის ტერიტორიაზე არსებული 620 ზეთისხილის ხიდან მოსავლის აღება დაახლოებით 150 ხეზეა შესაძლებელი.

მისი შეფასებით, წელს 150-დან 200 კილოგრამამდე ზეთის მიღებაა მოსალოდნელი. ლაბორატორიული შემოწმებისა და ხარისხის დადასტურების შემდეგ პროდუქტი ბოთლებში ჩამოისხმება და სოციალურად დაუცველ მოსახლეობას გადაეცემა.

მან ასევე აღნიშნა, რომ ეს არის საზოგადოებრივი ჩართულობის მნიშვნელოვანი ინიციატივა, რომელიც ადამიანებს ახსენებს, რამდენად მნიშვნელოვანია ბუნების მიერ მოცემული რესურსების დაფასება.