ავსტრიის ზოოპარკში მარტორქა თავს დაესხა მომვლელს და მოკლა

დღეს დილით ტრაგედია დატრიალდა ავსტრიის ქალაქ ზალცბურგის ზოოპარკში, როდესაც 1,8 ტონა წონის მდედრი მარტორქა თავს დაესხა და მოკლა ამავე ზოოპარკის 33 წლის თანამშრომელი, როდესაც ის მორიგ სამუშაოს ასრულებდა.

ახალგაზრდა ქალი თავდასხმისთანავე რამდენიმე წუთში ადგილზე გარდაიცვალა, ცხოველის გაყვანის მცდელობისას ასევე მძიმედ დაშავდა კიდევ ერთი 34 წლის მომვლელი.

ადგილობრივი პოლიციის ცნობით, ინციდენტი მაშინ მოხდა, როდესაც თანამშრომელი მარტორქისთვის მწერების საწინააღმდეგო საშუალების წასმას ცდილობდა.

მძიმედ დაშავებული მეორე მომვლელი სასწრაფო დახმარების მანქანით ზალცბურგის საუნივერსიტეტო ჰოსპიტალში გადაიყვანეს, ადგილზე კი კრიზისების მართვის ჯგუფი მუშაობს.

ზოოპარკი, რომელშიც 1500 ცხოველია და 400 000-ზე მეტ ვიზიტორს იღებს, დღეს (12/9) დაკეტილი რჩება.