პოლიფარმაციის უკუჩვენებები

პოლიფარმაციის უკუჩვენებები

ხანდაზმულებში ერთდროულად ხუთი ან მეტი მედიკამენტის ყოველდღიური მიღება პოლიფარმაციად, ანუ მრავალმედიკამენტურ თერაპიად, ითვლება. სპეციალისტების შეფასებით, მედიკამენტების დიდი რაოდენობა ზრდის გვერდითი ეფექტების, წამალთაშორისი ურთიერთქმედებების, დაცემის, კოგნიტიური დარღვევებისა და სხვა გართულებების რისკს.

ევროპული მონაცემებით, 65 წელს გადაცილებულთა შორის პოლიფარმაციის საშუალო მაჩვენებელი 36,2%-ია. კვლევების მიხედვით, ხანდაზმულთა ჰოსპიტალიზაციის დაახლოებით 10–12% უშუალოდ მედიკამენტების გვერდით ეფექტებს უკავშირდება, ხოლო გადაუდებელი და დაუგეგმავი ჰოსპიტალიზაციების შემთხვევაში ეს მაჩვენებელი ზოგიერთ მონაცემში 30%-მდე აღწევს.

განსაკუთრებული ყურადღება საჭიროა პოტენციურად შეუსაბამო მედიკამენტების მიმართ. პოლიფარმაციის მქონე ხანდაზმულებში ასეთი პრეპარატის მიღების ალბათობა მნიშვნელოვნად იზრდება და კვლევების მიხედვით, პაციენტების 39,6–74%-ს შესაძლოა მინიმუმ ერთი ასეთი მედიკამენტი ჰქონდეს დანიშნული.

სპეციალისტები რეკომენდაციას უწევენ ხანდაზმულთა მედიკამენტური თერაპიის რეგულარულ, სასურველია წლიურ გადახედვას, განსაკუთრებით მათთვის, ვინც მრავალ პრეპარატს იღებს. ამ პროცესში მნიშვნელოვანი როლი ეკისრებათ როგორც მკურნალ ექიმს, ისე კლინიკურ ფარმაკოლოგსა და ფარმაცევტს.

ფარმაცევტებმა უნდა შეაფასონ არა მხოლოდ დანიშნული პრეპარატების თავსებადობა, არამედ ურეცეპტოდ გაცემული მედიკამენტები, მცენარეული საშუალებები და საკვები დანამატებიც. სპეციალისტები განსაკუთრებით აფრთხილებენ პაციენტებს, რომ ახალი მედიკამენტი ექიმთან ან ფარმაცევტთან კონსულტაციის გარეშე არ დაამატონ, რადგან სხვადასხვა პრეპარატის კომბინაციამ შესაძლოა ჯანმრთელობისთვის სერიოზული რისკები შექმნას.