საბერძნეთი: ახალი სასწავლო წელი დაიწყო
საბერძნეთი: ახალი სასწავლო წელი დაიწყო
საბერძნეთის საბავშვო ბაღებში, დაწყებით, საშუალო და დამამთავრებელ კლასებში 2026-2027 სასწავლო წელი დღეს, 11 სექტემბერს, ტრადიციული კურთხევის ცერემონიით დაიწყო. სკოლებმა მოსწავლეებს კარი ოფიციალურად გაუღეს და სასწავლო პროცესი დაიწყო.
ახალი სასწავლო წელი განათლების სისტემაში რამდენიმე სიახლეს მოიტანს. სკოლებში მუშაობას იწყებს 5 259 ახალი მასწავლებელი, მათ შორის ზოგადი განათლებისა და სპეციალური განათლების პედაგოგები. შემცვლელი მასწავლებლების მიღების პირველი ეტაპი უკვე დასრულებულია, ხოლო მეორე ეტაპი სექტემბრის ბოლომდე გაგრძელდება.
ერთ-ერთი მთავარი სიახლე იქნება საერთაშორისო ბაკალავრიატის (IB) პროგრამის პირველად დანერგვა საბერძნეთის 11 საჯარო სკოლაში. ასევე ამოქმედდება 51 ახალი ან განახლებული სასწავლო პროგრამა.
მოსწავლეებისთვის, რომლებიც რელიგიის გაკვეთილისგან გათავისუფლდებიან, დაწყებითი სკოლის მესამე კლასიდან ლიცეუმის დამამთავრებელ კლასამდე შესაძლებელი იქნება ეთიკის საგნის შესწაბლა.
მეცხრე კლასის მოსწავლეებს ასევე ექნებათ შესაძლებლობა, უფასოდ, ელექტრონულად ჩააბარონ სახელმწიფო ენის ცოდნის სერტიფიკატის გამოცდა ინგლისურ, ფრანგულ, გერმანულ ან იტალიურ ენებში.
2026-2027 სასწავლო წელს მუშაობას დაიწყებს კიდევ 8 ახალი საჯარო ონასისის სკოლა გიმნაზიისა და ლიცეუმის დონეზე.
განათლების სამინისტრო ასევე გეგმავს ციფრული რეპეტიტორის პროგრამის გაფართოებას. პირდაპირი ონლაინგაკვეთილები, რომლებიც აქამდე ძირითადად ლიცეუმის დამამთავრებელი კლასისთვის იყო ხელმისაწვდომი, წელს პირველ და მეორე კლასებზეც გავრცელდება.
