ავტობუსების და ტროლეიბუსების გაფიცვა ხვალ, ხუთშაბათს

საბერძნეთის საჯარო სექტორში დასაქმებულთა პროფკავშირების მიერ შრომის კანონპროექტში შეტანილ ცვლილებებთან დაკავშირებით პროტესტის გამოხატვის მიზნით ხვალ, ხუთშაბათს (21/09), 24 საათიანი გაფიცვა დაანონსდა.

პროფკავშირების წარმომადგენლები შეიკრიბებიან დილით 10:30 საათზე კლათმონოს და სინდაგმას მოედანზე.

საპროტესტო აქციებში საზოგადოებრივი ტრანსპორტიდან მონაწილეობენ ავტობუსების მძღოლები, რომლებიც ცვლის დაწყებიდან დილის 9:00 საათამდე, ხოლო საღამოს 21:00 საათიდან სამუშაო საათების დასრულებამდე გაიფიცებიან.

კერძოდ, ავტობუსები მხოლოდ დილის 9:00 საათიდან საღამოს 21:00 საათამდე იმოძრავებენ.

იგივე გრაფიკით იმოძრავებენ ტროლეიბუსებიც.

24 საათიან გაფიცვაში მონაწილეობას მიიღებენ ასევე საჰაერო  ტრანსპორტის კონტროლიორები, რის გამოც ავიაკომპანიების ფრენებში მოსალოდნელია ცვლილებები, რის შესახებაც მათ უკვე აცნობეს იმ მგზავრებს, რომელთაც ბილეთები უკვე დაჯავშნული აქვთ წინასწარ.

გაფიცვაში მონაწილეობენ ასევე პედაგოგთა პროფკავშირები, საავადმყოფოების პერსონალი და ექიმები.