ავტომანქანა საცხობში შევარდა – უბედურმა შემთხვევამ 68 წლის ბრიტანელი ტურისტის სიცოცხლე იმსხვერპლა
ავტომანქანა საცხობში შევარდა – უბედურმა შემთხვევამ 68 წლის ბრიტანელი ტურისტის სიცოცხლე იმსხვერპლა
ტრაგიკულად დაასრულა სიცოცხლე 68 წლის ბრიტანეთის მოქალაქემ, რომელიც კუნძულ კოსზე მეუღლესთან ერთად საცხობში სადილობდა, როცა უეცრად საცხობში მაღალი სიჩქარით მიმავალი ავტომანქანა შევარდა და პირდაპირ წყვილის მაგიდას შეეჯახა.
ძლიერი შეჯახების შედეგად მძიმედ არის დაშავებული გარდაცვლილი ტურისტის 69 წლის მეუღლეც, რომელიც ამ დრომდე კუნძულის საავადმყოფოში ინტენსიური თერაპიის განყოფილებაშია განთავსებული.
უბედური შემთხვევა პარასკევს, 30 მაისს მოხდა, როცა 50 წლის მძღოლმა, რომელიც ავტომანქანით ტიგაკიუს მუნიციპალურ გზაზე მიდიოდა, უეცრად საჭეზე კონტროლი დაკარგა, გზის სავალი ნაწილიდან გადავიდა და საცხობის შესასვლელში შევარდა.
კუნძულზე დასასვენებლად ჩასული წყვილი კი სწორედ ამ საბედისწერო მომენტში იყო სასადილოდ გასული.
საცხობის მეპატრონემ protohema.gr-თან საუბრისას განაცხადა, რომ საბედნიეროდ შეჯახების შედეგად სხვა არავინ დაშავებულა და საცხობის თანამშრომლები გადარჩნენ. იქვე დასძინა, რომ რადგან ავტომანქანა ავტომატიკა იყო, მძღოლს გაზი და მუხრუჭი აერია და სწორედ ამიტომ მოხდა ეს საბედისწერო შემთხვევა.
