ბერძენი ბიზნესმენი უცხოელ თანამშრომელს თავს დაესხა
ატიკის უსაფრთხოების დირექტორატის, რასისტული ძალადობის წინააღმდეგ ბრძოლის დეპარტამენტის პოლიციის თანამშრომლებმა 41 წლის ბერძენი ბიზნესმენი დააკავეს.
შემთხვევა კამინიაში მოხდა. აღნიშნული პიროვნება ორ უცხოელ თანამშრომელთან პირადი უთანხმოების გამო, მათ საცხოვრებელ ბინაში მივიდა.
ვინაიდან ის ადამიანები, რომლებსაც ეძებდა იქ ვერ იპოვა, სასტიკად გაუსწორდა ბინაში მყოფ მათ თანამემამულე მამაკაცს.
ბიზნესმენმა მას ჯერ რასისტული ფრაზებით მიაყენა შეურაცხყოფა, შემდეგ კი მუქარის ძალით წაართვა მობილური ტელეფონი, ფიზიკურად გაუსწორდა და სასტიკად ნაცემი, უგონო მდგომარეობაში მყოფი დატოვა.
დაშავებული მამაკაცი სასწრაფო დახმარების მანქანით საავადმყოფოში გადაიყვანეს.
დაკავების შემდეგ თავდამსხმელს ბრალად წარედგინა სხეულის მძიმე დაზიანება, მუქარა, სიტყვიერი შეურაცხყოფა, ქურდობა და საზოგადოებრივი წესრიგის დარღვევა, რის საფუძველზეც ის გადაყვანილი იქნა პირეოსის რაიონულ პროკურატურაში.
