იტალიის ყოფილი პრემიერი, სილვიო ბერლუსკონი გარდაიცვალა. მისი დაკრძალვის დღე ოთხშაბათი ეროვნული გლოვის დღედ გამოცხადდა

დღეს დილით, 9:30 საათზე (იტალიის დროით), 86 წლის ასაკში, იტალიის ყოფილი პრემიერი სილვიო ბერლუსკონი გარდაიცვალა.ის პარასკევიდან ჯანმრთელობის მდგომარეობის გაუარესების გამო მილანის სან რაფაელის საავადმყოფოში იყო ჰოსპიტალიზირებული.

მისი მდგომარეობა ძალიან მძიმე იყო და უკვე, ორშაბათს დილიდან, მისი ძმა, პაოლო და მისი შვილები, მარინა, ელეონორა, ბარბარა და პიერი მილანის საავადმყოფოში მივიდნენ.

სილვიო ბერლუსკონის დაკრძალვის ცერემონია ოთხშაბათს, ადგილობრივი დროით 15:00 საათზე, მილანის საკათედრო ტაძარში გაიმართება და ეს დღე ეროვნული გლოვის დღედ გამოცხადდა.

იტალიის მთავრობის განკარგულებით გლოვის ნიშნად ქვეყნის ყველა საჯარო უწყების შენობაზე, ასევე მის საელჩოებში საზღვარგარეთ, დროშები ნახევრად დაშვებული იქნება.

თუმცა, ასევე იტალიის ხელისუფლების გადაწყვეტილებით, სილვიო ბერლუსკონის საჯარო პანაშვიდი მოქალაქეთა დიდი აქტივობის კონტროლის სირთულის გამო არ გაიმართება.

ამასობაში, არკორეს ვილის გარეთ, სადაც გარდაცვლილი ყოფილი პრემიერის ცხედარი გადაასვენეს, მოქალაქეების დიდმა რაოდენობამ დაიწყო შეკრება, მაგრამ სასახლეში შესვლა მხოლოდ გარდაცვლილის ახლო ნათესავებს და ოჯახის მეგობრებს შეუძლიათ.