კლიმატური ფენომენი “დანიელი” სამხრეთ პელიონში – ავტომანქანები წყალში დაცურავენ

წყალდიდობის გამო თესალიაში შექმნილი მდგომარეობა უკიდურესად მძიმე რჩება, რადგან მეტეოროლოგიური ფენომენი გრძელდება და მთელ რეგიონს მოიცავს.

როგორც მილინას ოლქის პრეზიდენტი, კონსტანტინოს გუძინისი აღნიშნავს მედიასთან საუბრისას, “ლანდშაფტი დაბომბილს ჰგავს, ხიდზე, რომელიც დასახლებას ტრიკერთან აკავშირებს, მოძრაობა შეჩერებულია, მანქანები წყალშია, სახლები  ნიაღვრებმა წაიღო”- აცხადებს ბ-ნი გუძინისი.

ვოლოსის მუნიციპალიტეტის მკაცრი რეკომენდაციის მიუხედავად, ქალაქის მთავარ ქუჩებზე მანქანებისა და ფეხით მოსიარულეთა გადაადგილების თავიდან აცილების შესახებ, ძლიერი წვიმის შედეგად ავტომობილების მოძრაობა არ შეწყვეტილა, რის გამოც ქალაქის მერი, ახილეას ბეოსი პირადად ცდილობდა მძღოლები დაერწმუნებინა სახლში წასულიყვნენ და შეეწყვიტათ მოძრაობა მას შემდეგ, რაც  ყველა საჯარო სერვისი დაიხურა.

ერთ-ერთი მძღოლი, რომლის მანქანაც ნიაღვარმა გაიტაცა ვოლოსში, გარდაცვლილი იპოვეს. გავრცელებული ცნობით, მას ორი საათის განმავლობაში ეძებდნენ, როგორც ცნობილი გახდა, ის ცხოველების გამოსაკვებად იყო წასული. პირველადი ინფორმაციით, მას მეწყრის შედეგად წაქცეული  კედელი დაეცა.

ასევე, დაკარგულად ითვლება 42 წლის მამაკაცი, რომელიც შვილთან ერთად გაუჩინარდა, თუმცა ბავშვი შემდეგ უვნებელი იპოვეს. პირველი ინფორმაციით, 42 წლის მამაკაცი ნიაღვარმა წაიღო, რადგან მიმდებარე ტერიტორიაზე გზები მდინარეებად გადაიქცა.