კუნძულ გავდოსზე ნუდისტების „ომი“ ადგილობრივ მუნიციპალიტეტთან
ნუდისტები პირდაპირ „ტანსაცმელიდან გამოძვრნენ” კუნძულ გავდოსზე, სარაკინიკოს პლაჟზე აღმართული მუნიციპალური აბრის ნახვის შემდეგ, რომელიც წელს აღნიშნულ პლაჟზე ნუდიზმს კრძალავს, რადგან კუნძულის ხელმძღვანელობამ აღნიშნული სანაპირო ყველასათვის ხელმისაწვდომ და ადვილად მისადგომ პლაჟად გადააკეთა.
აღშფოთებულმა ნუდისტებმა აბრა ჩამოაგდეს და სოციალურ მედიაში განთავსებული კრიტიკული პოსტებით პროტესტი გამოხატეს გავდოსის მუნიციპალიტეტის მიმართ.
ცნობილია, რომ კუნძული სამოთხეა თავისუფალი კემპინგისა და ნუდისტებისთვის, თუმცა წელს პირველად სარაკინიკოს სანაპიროზე განათავსდა აბრა, სადაც ნათქვამია: „ნუდიზმი აკრძალულია“, რასაც უკვე მწვავე გამოხმაურება მოჰყვა.
“კუნძულზე მოვდივართ, რათა თავი თავისუფლად ვიგრძნოთ ბუნებაში, გვინდა ყველაფრისგან განვთავისუფლდეთ და უცებ ვიგებთ ამ აკრძალვის შესახებ “, – წერენ ისინი სოციალურ მედიაში.
შედეგად, ნუდისტებმა აბრა ჩამოაგდეს, თუმცა გავდოსის მერმა, რომელიც უკვე ცნობილი გახდა თავისუფალ ბანაკებთან კონფლიქტით, კვლავ აღადგინა იგი და გამოაცხადა, რომ ამკრძალავი დაფა ადგილზე დარჩება მანამდე, სანამ ნუდისტები გონს არ მოეგებიან და სანაპიროზე საცურაო კოსტიუმებს არ ჩაიცვამენ.
