საბერძნეთი: ყალბი მართვის მოწმობების გაცემის დანაშაულებრივი სქემა
საბერძნეთში რამდენიმე დღეა წინა პლანზეა წამოწეული თემა ყალბი მართვის მოწმობების გაცემის თაობაზე.
საუბარია არალეგალური მართვის მოწმობების გაცემის დიდ კორუფციულ სქემაზე, რომელიც 2017- 2018 წლებიდან მოქმედებდა, დაახლოებით ნახევარი მილიონი ევროს ბრუნვით.
კარგად ორგანიზებული თაღლითური ქსელი საეჭვო შესაძლებლობების მქონე პოტენციურ მძღოლებს, 2000 ევროს საფასურად მართვის მოწმობის თეორიული გამოცდებისგან ათავისუფლებდა.
კანდიდატებს შორის იყვნენ ემიგრანტები, რომლებიც არასაკმარისად ფლობდნენ ბერძნულ ენას, ასევე არასრულწლოვანები და მოხუცები.
აღნიშნულ კორუფციულ სქემაში მონაწილეობდნენ ტრანსპორტის დეპარტამენტის თანამშრომლები, გამომცდელები და მართვის ინსტრუქტორები.
სპეციალურად მოწყობილ ოთახებში აწყობდნენ ვირტუალურ გამოცდებს ცარიელ მერხებთან, ფიზიკური დასწრების გარეშე, რის შემდეგაც იქმნებოდა კანდიდატის მიერ გამოცდის ჩაბარების დამადასტურებელი ყალბი დოკუმენტები.
აღნიშნულ სქემაში მონაწილე პირებს 10 წლამდე თავისუფლების აღკვეთა ემუქრებათ.
სასამართლო პროცესი რამდენიმე თვეში გაიმართება.
თაღლითურ სქემაში მონაწილეობისათვის ბრალდებულია სულ 24 ადამიანი. აქედან 14 ტრანსპორტის სამინისტროს თანამშრომელია, 10 კი მართვის ინსტრუქტორი. ყველა მათგანი ერთად , ერთ კორუფციულ ქსელში იყო ჩართული.
მათ შორის არიან ექიმებიც, რომლებიც გასცემდნენ ჯანმრთელობის დამადასტურებელ ყალბ ცნობებს, ყოველგვარი საჭირო გამოკვლევების ჩატარების გარეშე.
გამოვლენილი უკანონობის მასშტაბები და შედეგები შოკისმომგვრელია, თუ გავითვალისწინებთ რომ მინიმუმ 200 ადამიანი ფიქსირდება თაღლითური გზით მიღებული ყალბი მართვის მოწმობით.
აქედან გამომდინარე ადვილი მისახვედრია, დიდ წილად რა არის გამომწვევი მიზეზი საბერძნეთში ბოლო წლებში მომრავლებული ავარიული შემთხვევებისა.
სტატისტიკური მონაცემებით 2022 წელს დასავლეთ საბერძნეთის სამივე რეგიონალურ ერთეულში 470 საგზაო შემთხვევა დაფიქსირდა, რომელშიც 57 ადამიანი დაიღუპა, ხოლო 537 მძიმედ ან მსუბუქად დაშავდა.
