საბერძნეთი: Dentist Pass ბრუნდება – ვის ეხება პროგრამა
საბერძნეთი: Dentist Pass ბრუნდება – ვის ეხება პროგრამა
საბერძნეთში Dentist Pass-ის პროგრამა ბრუნდება, ამჯერად გაფართოებული ასაკობრივი კრიტერიუმებით. ამის შესახებ პრემიერ-მინისტრმა კირიაკოს მიცოტაკისმა სალონიკის საერთაშორისო გამოფენაზე განაცხადა.
პროგრამის ფარგლებში, დაახლოებით 300 000 ბავშვი უფასო პროფილაქტიკურ სტომატოლოგიურ შემოწმებას შეძლებს. პროფილაქტიკური შემოწმების გავლა შეუძლიათ 5-დან 14 წლამდე ასაკის ბავშვებს. წინა პროგრამისგან განსხვავებით, რომელიც 2023 წელს 6–დან 12 წლამდე ბავშვებზე ვრცელდებოდა, ასაკობრივი ზღვარი გაიზარდა.
Dentist Pass-ის თავდაპირველი პროგრამა შემოსავლის კრიტერიუმებს არ ითვალისწინებდა და თითოეულ ბავშვზე 40 ევროს ფინანსურ დახმარებას გასცემდა. თანხა ციფრული ბარათის საშუალებით გაიცემოდა და მისი გამოყენება შესაძლებელი იყო პრევენციული სტომატოლოგიური მომსახურებისთვის, მათ შორის პირის ღრუს მდგომარეობის შემოწმებისა და კბილების პროფესიული წმენდისთვის.
ახალი პროგრამის დეტალები, მათ შორის განაცხადის შეტანის პროცედურა და დაფინანსებული მომსახურებების ჩამონათვალი, უახლოეს პერიოდში დაზუსტდება.
პრემიერმა ასევე განაცხადა, რომ პრევენციის სახელმწიფო პროგრამა 2030 წლიდან მუდმივ ხასიათს მიიღებს და ახალი უფასო გამოკვლევები დაემატება. მათ შორის დაგეგმილია კანის კიბოს პრევენციული სკრინინგიც, რომლის მიზანიც დაავადების ადრეული აღმოჩენა და დროული მკურნალობაა.
