რაფინასა და ლავრიოს პორტებიდან დამატებითი რეისები შესრულდება

რაფინასა და ლავრიოს პორტებიდან დამატებითი რეისები შესრულდება

საბერძნეთში, ძლიერი ქარის გამო დაწესებული გემების მოძრაობის შეზღუდვა 14 აგვისტოს, 16:00 საათის შემდეგ, რაფინასა და ლავრიოს პორტებიდან მოიხსნა. ბორნების მოძრაობა ეტაპობრივად ჩვეულ რეჟიმს უბრუნდება.

მგზავრთა გაზრდილი ნაკადის გამო, განსაკუთრებით კი 15 აგვისტოს ღვთისმშობლის მიძინების დღესასწაულთან დაკავშირებით, ორივე პორტიდან დამატებითი რეისები დაინიშნა. რაფინადან დაგეგმილია ხუთი, ხოლო ლავრიოდან სამი რეისი. პარალელურად, პირეას პორტიდან გემები ჩვეულ რეჟიმში მოძრაობენ.

რაფინადან გემები გაემგზავრებიან ტინოსისა და მიკონოსის მიმართულებით, ასევე კუნძული ანდროს. ლავრიოდან კი რეისები შესრულდება ანდროს, ტინოსის, მიკონოსის, პაროსისა და მილოსის მიმართულებით. რაფინასკენ მიმავალი რამდენიმე გემი, რომლებიც შეზღუდვის დროს ზღვაში იმყოფებოდა, უკვე აგრძელებს მოძრაობას.

მიუხედავად შეზღუდვის მოხსნისა, ეგეოსის ზღვაში კვლავ ძლიერი ქარია. საბერძნეთის მეტეოროლოგიური სამსახურის (EMY) ინფორმაციით, რიგ რაიონებში ჩრდილოეთის მიმართულების ქარის სიჩქარე 7-9 ბოფორს აღწევს, მათ შორის კაფირეოსის სრუტეში, ცენტრალურ და ჩრდილო-აღმოსავლეთ ეგეოსში, სამხრეთ ევიას ყურესა და სხვა საზღვაო რაიონებში.

მგზავრებმა პორტში მისვლამდე უნდა გადაამოწმონ ინფორმაცია შესაბამის სატრანსპორტო კომპანიებთან ან ადგილობრივ სანავსადგურო უწყებებთან, რადგან ამინდის გაუარესების შემთხვევაში რეისების განრიგი შესაძლოა კვლავ შეიცვალოს.