ათასობით დაშავებული და ნანგრევებით დაფარული მარაკეში 6,8 რიხტერის სიმძლავრის მიწისძვრის შემდეგ

დრამატულ მომენტებს გადიან  მაროკოს მოქალაქეები რიხტერის შკალით 6,8 სიმძლავრის მიწისძვრის შემდეგ.

მსხვერპლმა უკვე 2000-ს გადააჭარბა და ეს რიცხვი თანდათან იზრდება, ტარდება ოპერაციები ნანგრევებში მოყოლილების და გადარჩენილების პოვნის იმედით. მაროკოს მთავრობამ დაღუპულთა გამო სამდღიანი ეროვნული გლოვა გამოაცხადა, ხოლო მოქალაქეები ქვეყნის ყველა მეჩეთში ილოცებენ დაღუპულთა და დაშავებულთათვის დღის განმავლობაში.

ქვეყნის მოქალაქეები, ერთის მხრივ გლოვობენ ახლობლებს, მეორე მხრივ კი ნანგრევებში  მოყოლილებს ეძებენ. მარაკეშის მაცხოვრებლები ჩივიან, რომ სახელმწიფოსგან დახმარება მინიმალურია.

ამავდროულად ქალაქის მიმდებარე სოფლებში, მოქალაქეები ჭრიან მასობრივ საფლავებს და ემშვიდობებიან თავიანთ გარდაცვლილებს.

ბიძგები უკვე მეორე დღეა გრძელდება, რაც მოსახლეობაში შიშს იწვევს. მიწისქვეშა ბიძგები რიხტერის 4,5 ბალს არ აღემატება, თუმცა პანიკისთვის ეს საკმარისია.

ამავდროულად, ექსპერტები შენობების სავალალო  მდგომარეობაზე მიუთითებენ. არქიტექტორები საუბრობენ გადაუდებელ აუცილებლობაზე, შეცვალონ ძველი შენობები ახალი, ანტისეისმური ძლიერი ნაგებობებით.

მაცხოვრებლებს განმეორებითი მიწისძვრის შიშით ქუჩაში ძილი ურჩევნიათ, თავის მხრივ კი პოლიცია უკრძალავს მათ სახლებში ხელახლა შესვლას.