ჯანმრთელობის არანაირი პრობლემა არ ჰქონდა – აცხადებს გიორგოს მაზონაკისის ადვოკატი

ჯანმრთელობის არანაირი პრობლემა არ ჰქონდა – აცხადებს გიორგოს მაზონაკისის ადვოკატი

ცნობილი ბერძენი მომღერლის, გიორგოს მაზონაკისის გარდაცვალებიდან რამდენიმე საათის შემდეგ მისი ადვოკატი და ახლო მეგობარი, ხარალამბოს ლიკუდისი, აცხადებს, რომ მომღერალს ჯანმრთელობის არანაირი პრობლემა არ ჰქონია.

ლიკუდისმა ამის შესახებ ტელეკომპანია ANT1-ს დილის გადაცემაში „კალიმერა ელადა“ ისაუბრა. მისი თქმით, მაზონაკისს გარდაცვალებამდე დაახლოებით ერთი კვირით ადრე შეხვდა და მის ჯანმრთელობასთან დაკავშირებით საეჭვო არაფერი შეუნიშნავს.

„მე გიორგოს დაახლოებით ერთი კვირის წინ შევხვდი. მას არანაირი, საერთოდ არანაირი ჯანმრთელობის პრობლემა არ ჰქონდა“, — განაცხადა ლიკუდისმა.

ადვოკატმა ასევე აღნიშნა, რომ რამდენადაც მისთვის არის ცნობილი, მომღერალს კარდიოლოგიური პრობლემაც არ ჰქონია. ამასთან, მისი თქმით, მაზონაკისის ჯანმრთელობის მდგომარეობის შესახებ უფრო სრულყოფილი ინფორმაცია მის პირად ექიმსა და ნათლიას, ზაფირიუს აქვს, რომელიც მას მრავალი წლის განმავლობაში მკურნალობდა და ახლოს იცნობდა.

ხარალამბოს ლიკუდისმა ასევე ისაუბრა იმ შესაძლო სამართლებრივ ნაბიჯებზე, რომლებიც მაზონაკისის ოჯახმა მისი გარდაცვალების შემდეგ შეიძლება გადადგას.

მისი განმარტებით, მომდევნო სამართლებრივი მოქმედებების განხორციელების უფლება ოჯახის წევრებს აქვთ:

„საპროცესო უფლებებით სარგებლობა ოჯახს შეუძლია. დღეს მათ დავუკავშირდები. არ ვიცი, პატივს სცემენ თუ არა გიორგოს არჩევანს და ჩემთან თანამშრომლობას გააგრძელებენ, თუ სხვა ადვოკატს აირჩევენ“, – განაცხადა ლიკუდისმა.

მისივე თქმით, ოჯახს შეუძლია ყველა საჭირო სამართლებრივი ნაბიჯი გადადგას, რათა სრულად გაირკვეს, რა ვითარებაში გარდაიცვალა ცნობილი მომღერალი:

„არ უნდა დავუშვათ, რომ შესაძლო პასუხისმგებლობის საკითხები გამოუძიებელი დარჩეს“, – აღნიშნა ადვოკატმა.