დუბაის საერთაშორისო აეროპორში თვითმფრინავის სატვირთო განყოფილებაში მოთავსებული გალიიდან დათვი გაიქცა
ერაყის პრემიერ-მინისტრმა გამოძიების დაწყების განკარგულება გასცა მას შემდეგ, რაც დუბაის საერთაშორისო აეროპორტში თვითმფრინავის სატვირთო განყოფილებაში მოთავსებული გალიიდან დათვი გაიქცა. ინციდენტმა მწვავე დაპირისპირება გამოიწვია იმის შესახებ, თუ ვინ არის დამნაშავე ცხოველის გაქცევაში.
ერაყის ავიახაზების ოფიციალურმა წარმომადგენელმა კვირას პრესასთან დაადასტურა, რომ დათვი მართლაც გადაყავდათ ერაყის დედაქალაქში. ოფიციალურმა პირმა, რომელმაც ანონიმურობის პირობით ისაუბრა, უარი თქვა ცხოველის მფლობელის ვინაობაზე.
Iraqi Airways-მა განაცხადა, რომ ის არ იყო პასუხისმგებელი დათვის გაქცევაზე და რომ თვითმფრინავის ეკიპაჟი თანამშრომლობდა არაბეთის გაერთიანებული საემიროების ხელისუფლებასთან, რომლებმაც გაგზავნეს ექსპერტები ცხოველის დასაძინებლად და თვითმფრინავიდან უსაფრთხოდ გასაყვანად.
სოციალურ მედიაში გავრცელებულ ვიდეოში ჩანს, რომ თვითმფრინავის კაპიტანი ბოდიშს უხდის მგზავრებს დათვის გაქცევის მცდელობის მიზეზით ფრენის დაგვიანების გამო.
ვიდეო ჩანაწერში ისმის ხმა, რომელიც აღნიშნავს, რომ თვითმფრინავის ბაღდადის მიმართულებით ფრენა ერთი საათით გადაიდო და მგზავრებს სთხოვეს დაეტოვებინათ ბორტი სანამ საკითხი მოგვარდებოდა.
დუბაის საერთაშორისო აეროპორტის წარმომადგენლებმა არჩიეს ამ საკითხზე განცხადება არ გაეკეთებინათ.
თავის მხრივ ავიაკომპანიამ “Iraqi Airways” განაცხადა, რომ დათვის ტრანსპორტირების პროცედურები ჩატარდა კანონის დაცვით და საჰაერო ტრანსპორტის საერთაშორისო ასოციაციის მიერ დამტკიცებული პროტოკოლებისა და სტანდარტების შესაბამისად.
ერაყში, განსაკუთრებით ბაღდადში, მდიდარ ადამიანთა შორის მტაცებელი ცხოველების, როგორც შინაური ცხოველის ფლობის ტენდენცია სულ უფრო პოპულარული ხდება, რაც ხელისუფლებას გამოწვევას უქმნის ველური ბუნების დაცვის სამართლებრივი ზომების ეფექტურად განხორციელებაში.
ბაღდადის პოლიცია მოუწოდებდა მოქალაქეებს, ითანამშრომლონ ხელისუფლებასთან, რათა თავიდან აიცილონ ამ ცხოველების ქალაქის ქუჩებში გაშვება ან რესტორნებში ეგზოტიკური სამზარეულოს მენიუში შეტანა. ისინი მოქალაქეებს მოუწოდებენ მსგავსი ინციდენტების გამოვლენის კუთხით აქტიურობისკენ, პრობლემის გადასაჭრელად.
