საბერძნეთი ათენის აღმოსავლეთით ქურთების ბანაკს ხურავს
ადგილობრივი მედიის ცნობით საბერძნეთი დახურავს ქურთების ბანაკს ქალაქ ლავრიოში, ათენის სამხრეთ- აღმოსავლეთით.
გავრცელებული ინფორმაციით ბანაკი, რომელიც 40 წელზე მეტია არსებობს, დაიხურება იმ მოტივით, რომ შენობები ცუდ მდგომარეობაშია და ისინი საშუალო დონის მიწისძვრასაც ვერ გაუძლებენ, ამიტომ იქ მცხოვრებ ადამიანებს სხვა ლტოლვილთა ბანაკებში გადაიყვანენ.
ლავრიოს ბანაკი თურქეთსა და საბერძნეთს შორის ურთიერთობაში დიდი ხანია დავის საგანია.
პრეზიდენტმა რეჯეფ ტაიფ ერდოღანმა ცოტა ხნის წინ დაადანაშაულა საბერძნეთი, შეერთებული შტატები და ევროკავშირის ზოგიერთი წევრი ქვეყანა ტერორისტების მფარველობაში.
ოფიციალური ანკარა აცხადებს რომ სახელმწიფო გადატრიალების მოწყობის მცდელობაში ბრალდებული და ქვეყნიდან გაქცეული პირები თავს აფარებენ ძირითადად საბერძნეთს, ევროპას, ინგლისსა და ამერიკას, ხოლო უშუალოდ საბერძნეთის ტერიტორიაზე მათ თავშესაფრად კონკრეტულად ლავრიოს ქურთების ბანაკია მითითებული.
საბერძნეთმა არაერთხელ უარყო თურქეთის პრეტენზიები და განაცხადა, რომ ის არ იცავს უცხოელ ტერორისტებს, რომ არაფერი ვთქვათ მათ წვრთნაზე.
ლავრიოს ბანაკის დახურვის შესახებ ინფორმაცია გავრცელდა მას შემდეგ, რაც საბერძნეთსა და თურქეთს შორის დიპლომატიური ურთიერთობები გაუმჯობესდა, რაშიც მნიშვნელოვანი როლი ითამაშა დამანგრეველი მიწისძვრისა და ტემპის ტრაგედიის შემდეგ ამ ორი ქვეყნის მიერ გამოხატულმა ურთიერთთანადგომამ.
