ხილ-ბოსტნეულზე გაზრდილი ფასები მომხმარებელთა პანიკას იწვევს

საბერძნეთში ბოლო დროს ყოველდღიური მოხმარების სასურსათო პროდუქტებზე და განსაკუთრებით ხილ-ბოსტნეულზე ფასები საგანგაშოდ გაიზარდა, რაც მოსახლეობის შეშფოთებას და სამართლიან აღშფოთებას იწვევს. მაგალითად პომიდორი ჩერი, რომლის ერთი  შეფუთვაც თითქმის 10 ევროდ იყიდება.

პომიდორი 9,9 ევრო

ყაბაყი 4,95 ევრო

კიტრი 3,5 ევრო

დიოზმო( პიტნა) 1,10 ევრო ცალი

ეს არის ბოსტნეულის ახლანდელი ფასების მცირე ჩამონათვალი ატიკაში მდებარე სასურსათო მაღაზიებში.

მომხმარებელთა კავშირის მონაცემებით, შარშანდელთან შედარებით ხილის და ბოსტნეულის ფასები  50%-ით არის გაზრდილი. “პროდუქტი, რომელიც იცვლის მინიმუმ ოთხ ხელს, სანამ მომხმარებლამდე მიაღწევს, ფასდება ოთხჯერ”, – განაცხადა მომხმარებელთა კავშირის პრეზიდენტმა აპოსტოლოს რატოპულოსმა .

თესალიის დაბლობის განადგურებამ ზოგიერთ ადამიანს მოგების მიღების შესაძლებლობა მისცა, რადგან ოფიციალური მონაცემებით, თესალიაში მოყვანილი ხილი და ბოსტნეული მოიცავს 28 000 ჰექტარს, რაც მთლიანი ეროვნული წარმოების მხოლოდ 7,5%-ს შეადგენს, შესაბამისად წყალდიდობის მიერ მიყენებული ზარალი არ ქმნის იმ დონის სასურსათო კრიზისს, რაც ფასების ასეთი კატასტროფულ ზრდას გაამართლებდა.