პარიზის აუქციონზე ნაპოლეონ ბონაპარტის ქუდი 1,9 მილიონ ევროდ გაიყიდა

პარიზის Drouot-ის აუქციონზე ნაპოლეონ ბონაპარტის ქუდი რეკორდულ 1,9 მილიონ ევროდ გაიყიდა.

თახვის ბეწვისგან დამზადებული ორნაწილიანი შავი ქუდი თავდაპირველად 600,000-დან 800,000 ევრომდე იყო შეფასებული. ამ დრომდე საიდუმლოდ რჩება თუ ვინ შეიძინა იგი, რადგან ახალმა მფლობელმა ინკოგნიტოდ დარჩენა ისურვა.

ისტორიკოსები ამბობენ, რომ ქუდი ნაპოლეონის იმიჯის განუყოფელი ნაწილი იყო, რომლის გვერდულად ტარებაც მას ბრძოლაში ცნობადს ხდიდა.

წლების განმავლობაში მან დაახლოებით 120 ორკუთხა ქუდი გამოიცვალა, რომელთაგან, ითვლება, რომ მხოლოდ 20 გადარჩა და მათ კერძო კოლექციონერები ფლობენ. აუქციონერების შეფასებით გაყიდული ქუდი კოლექციონერებისთვის  ნამდვილი წმინდა გრაალია.

აუქციონერ ჟან პიერ ოსენატის თქმით „ხალხი ნაპოლეონის ქუდს ყველგან ცნობდა. როდესაც ბრძოლის ველზე ქუდს ხედავდნენ, იცოდნენ, რომ იმპერატორი იქ იყო. ჩვეულებრივ კი მას ქუდი ყოველთვის თავზე ეხურა, ან ხელში ეჭირა, ან ძირს აგდებდა. ეს იყო გამოსახულება – იმპერატორის სიმბოლო”.

აუქციონერებმა განაცხადეს, რომ გაყიდული ქუდი არის უნიკალური წარმოშობის, რომელიც შემორჩა მე-19 საუკუნის განმავლობაში ნაპოლეონის სასახლის ოფიცრის ოჯახში.