კანადაში გაჩენილმა ხანძრის კვამლმა აშშ-ის რამდენიმე შტატი დაფარა, ხელისუფლება მოსახლეობას სახლებში დარჩენისკენ მოუწოდებს
კანადის ხელისუფლებამ დღეს ადრე გამოაცხადა განგაში ტორონტოში ჰაერის მდგომარეობის შესახებ ხანძრის გამო, რომელიც რამდენიმე დღეა თითქმის მთელს ქვეყანაში მძვინვარებს.
უკვე დამწვარია სულ მცირე 33 მილიონი ჰექტარი ტყე და 120 000-ზე მეტი ადამიანი იძულებული გახდა დროებით დაეტოვებინა საცხოვრებელი სახლები
ჰაერის დაბინძურების შესახებ გაფრთხილება გაჟღერდა დღეს აშშ-ის ათზე მეტ შტატშიც, რადგან კანადიდან კვამლი თანდათან უფრო სამხრეთით მიედინება.
ბევრი ქალაქის ცამ ნაცრისფერი, ბუნდოვანი ფერი მიიღო და ადგილობრივი ხელისუფლების წარმომადგენლები მოსახლეობას სახლში დარჩენისკენ მოუწოდებენ.
ჯანდაცვის ოფიციალურმა წარმომადგენლებმა ვერმონტიდან სამხრეთ კაროლინამდე, ასევე ოჰაიოსა და კანზასში, მოუწოდეს მილიონობით მაცხოვრებელს შეზღუდონ დრო, რომელსაც ისინი ატარებენ გარეთ, რადგან ატმოსფეროში გაჩენილმა კვამლის მიკრონაწილაკებმა შეიძლება გამოიწვიოს სუნთქვის გაძნელება და საფრთხე შეუქმნას მათ ჯანმრთელობას.
აღმოსავლეთ სანაპიროზე მდებარე სკოლებმა გააუქმეს გარე აქტივობები, როგორიცაა სპორტული თამაშები და გასვლები, მოსწავლეთა დაცვის მიზნით.
ნიუ-იორკში საჯარო სკოლებმა გააუქმეს ან გადაიტანეს თავიანთი გარე საქმიანობა დახურულ სივრცეში.
ნიუ-იორკისა და სხვა მრავალი ქალაქის ცა ნაცრისფერი გახდა და ჰაერში დამწვარი ხის სუნი დგას. ბევრგან ამომავალი მზე პატარა, ნარინჯისფერი დისკის სახით ჩანდა. ქალაქის ცათამბჯენები, რომლებიც ჩვეულებრივ ჩანს მრავალი კილომეტრის მანძილზე, თითქმის გაქრა ნისლში.
დღეს დილით ნიუ-იორკი ჰაერის დაბინძურების ხარისხით მეორე ადგილზე იყო ინდოეთის ახალი დელის შემდეგ, იტყობინება შვეიცარიული კომპანია IQAir, რომელიც ზომავს ჰაერის მდგომარეობას დიდ ქალაქებში.
ტყის ხანძრის კვამლი დაკავშირებულია ინფარქტისა და ინსულტის მატებასთან, ხოლო საავადმყოფოების სასწრაფო დახმარების პალატები სავსეა პაციენტებით,რომელთაც აღენიშნებათ ასთმის შეტევები და სხვა რესპირატორული დაავადებები, ასევე თვალის ან კანის გაღიზიანებები.
„ეს არის უპრეცედენტო მოვლენა ჩვენს ქალაქში და ნიუ-იორკელებმა სიფრთხილის ზომები უნდა მიიღონ“, – თქვა მერმა ერიკ ადამსმა.
