ეგვიპტე: წითელ ზღვაში მცურავ ტურისტულ იახტას ცეცხლი გაუჩნდა, დაკარგულია სამი ადამიანი
ტურისტულ იახტას, რომელზეც საკრუიზო პროგრამაში მონაწილე 29 ადამიანი იმყოფებოდა, ეგვიპტის წითელ ზღვაში ცურვისას, ამ დრომდე გაურკვეველი მიზეზებით ცეცხლი გაუჩნდა.
დაკარგულია მგზავრთაგან სამი მათგანი, რომლებიც ბრიტანეთის მოქალაქეები არიან.
როგორც ბრიტანული გაზეთი “The Sun” პოლიციის წყაროებზე დაყრდნობით იუწყება, მგზავრებმა საშინელი წუთები გადაიტანეს.
შემთხვევის შესახებ სამაშველო ბრიგადებს დღეს დილით შეატყობინეს, რომლებიც ცეცხლმოკიდებულ ნავში მყოფი მგზავრების გადასარჩენად გაემართნენ.
ამ დროისთვის გადარჩენილია 26 მგზავრი, მათგან 12 ბრიტანელია, ხოლო 14 ეგვიპტური წარმოშობის. ჯერ ისევ მიმდინარეობს ოპერაცია სამი ბრიტანელი ტურისტის მოსაძებნად.
პოლიციის განცხადებით ეკიპაჟის გადარჩენილი წევრებიდან არავინ დაშავებულა.
ტურისტული იახტა 6 ივნისს გავიდა ეგვიპტის პორტ ღალიბიდან, რომელიც მდებარეობს აღმოსავლეთ ქალაქ მარსა ალამში.
